Son illərin ən gərgin dövrlərindən birini yaşayan Avropanın şərq sərhədlərində beton səngərlər, tank əleyhinə qurğular və yüksək texnologiyalı müdafiə sistemləri qurulur, xalq isə psixoloji cəhətdən müharibəyə hazırlanır.
Reyting.az xəbər verir ki, Avropanın şərqindəki NATO ölkələri Rusiyanın Ukraynaya qarşı müharibəsindən sonra Moskvanın ehtimal olunan yeni hücumuna hazır vəziyyətə gətirilir.
Finlandiya, Estoniya, Latviya, Litva və Polşa sərhəd xətlərində böyük istehkamlar qurur, beton xəndəklər düzəldir, tank səngərləri qazır, əraziləri minalayır, yüksək texnologiyalı müşahidə sistemləri yaradır və yeni müdafiə sistemi vasitəsi ilə Moskvanın genişlənmə təhlükəsinə hazırlaşırlar.
Finlandiya Rusiya sərhədində 200 kilometrlik hasar çəkərkən, Baltikyanı ölkələr “Baltik Müdafiə Xətti” adlı 600 millik müdafiə layihəsi ilə sərhədlərini qalalara çevirir. Polşa isə “Şərq Qalxanı” təşəbbüsü ilə 1945-ci ildən bəri ən böyük sərhəd müdafiəsini həyata keçirib.
2023-cü ildə NATO-ya üzv olan Finlandiya Sovet İttifaqına qarşı qış müharibəsi təcrübəsindən bu yana şərq təhlükəsinə qarşı hazırlıqlarını heç vaxt dayandırmayıb. Ölkədə hələ də məcburi hərbi xidmət davam edir. 280 minlik döyüş qüvvəsinin yalnız 10 faizi peşəkar əsgərlərdən ibarətdir. Cəmi 5,6 milyon əhalisi olan ölkənin ehtiyatda 900 min əsgəri var.
Finlandiya Rusiyanın hücumu zamanı səngərlərə çəkilməyə və düşməni bataqlıqlara və meşələrə yönəltməyə hazırdır. Ölkədə nüvə hücumuna qarşı 4,4 milyon insan üçün sığınacaq, 6 ay yanacaq, 9 aylıq taxıl ehtiyatı da var.
Danimarka isə Skandinaviya ölkələri arasında qadınları məcburi hərbi xidmətə cəlb edən üçüncü ölkə olmaqla böyük bir addım atıb. Mütəxəssislər bu döyüş hazırlığını qiymətləndirirlər. Parlamentin iyunun 11-də qəbul etdiyi yeni qanuna əsasən, 2025-ci il iyulun 1-dən etibarən kişilərlə yanaşı, 18 yaşına çatmış qadınlar da icbari hərbi sistemə daxil ediləcəklər.
Bu arada, Estoniya, Latviya və Litva NATO-nun ən həssas xətti ilə birlikdə şərq istehkamlarını gücləndirib. Sovet dövründə ilhaq edilmiş bu ölkələr Rusiyanın yenidən ekspansiya siyasəti aparacağından ehtiyat edirlər.
Litva həm Rusiyanın Kalininqrad vilayəti, həm də Belarusla sərhəd qonşusudur. Ən kritik nöqtə cəmi 100 kilometr uzunluğunda olan Suvalki dəhlizidir. Bu dar dəhliz Baltikyanı ölkələrin Qərblə quru əlaqəsini təmin edir. Rusiya və Belarus bu xətti kəssə, Baltikyanı ölkələr təcrid vəziyyətində qala bilər.
Hər üç ölkə Trampın işarə etdiyi kimi, hərbi xərclərini ÜDM-nin 5 faizinə çatdırmağa hazırlaşır. Litva 17500 əsgərdən ibarət milli ordu yaratmağa, Latviya məcburi hərbi xidmətini geri qaytarmağa, Estoniya isə 600 istehkam məntəqəsinin tikintisinə başlayıb. Üç ayrı tərəfdaş da kütləvi evakuasiya planı üzərində işləyir.
Polşaya gəlincə, bu ölkənin 2,3 milyard avro dəyərində olan “Şərq Qalxanı” layihəsi ilə şərq sərhədlərini hərbi divara çevirir. Bu çərçivədə tank tələləri, dron əleyhinə sistemlər, gecə göstərən kameralar quraşdırılır, indekslər yaradılır və əraziləri minalayırlar.
Y. QACAR
