Ümumdünya Səhiyyə Təşkilatı (ÜST) bütün ölkələri sağlamlıq vergiləri hesabına 2035-ci ilə qədər spirt, siqaret və şəkərli sərinləşdirici içkilərin qiymətlərini ən azı 50% artırmağa çağırıb. Bu barədə qurumun mətbuat xidməti məlumat yayıb.
ÜST ekspertləri hesab edirlər ki, belə bir tədbir xroniki xəstəliklərin inkişafının qarşısını alacaq və ölkələrə kritik büdcə gəlirləri əldə etməyə kömək edəcək. Təşəbbüs "3-dən 35-ə" adlanır.
Təşkilat qeyd edib ki, o, qismən səhiyyə sistemlərinə ağır yük qoyan qeyri-infeksion xəstəliklərin (QİX) artması fonunda hazırlanıb. Ürək xəstəlikləri, xərçəng və diabet də daxil olmaqla yoluxucu olmayan xəstəliklər dünya üzrə bütün ölümlərin 75%-dən çoxuna səbəb olur. Son hesabat göstərir ki, bu məhsulların qiymətlərinin birdəfəlik 50% artması növbəti 50 il ərzində 50 milyon vaxtından əvvəl ölümün qarşısını ala bilər.
Təşəbbüsün məqsədi on il ərzində 1 trilyon dollar toplamaqdır. ÜST qeyd edib ki, 2012-2022-ci illər arasında 140-a yaxın ölkə tütünə aksiz vergilərini artırıb və bu, real qiymətlərin orta hesabla 50%-dən çox artmasına səbəb olub.
Almaz Həsənli
