“Konstitusiya və Suverenlik İli” çərçivəsində Yeni Azərbaycan Partiyası Kürdəmir rayon təşkilatının və Kürdəmir rayon İcra Hakimiyyətinin birgə təşkilatçılığı ilə “14 iyul 1969-cu il: Müstəqil və qüdrətli Azərbaycanın təməlinin qoyulduğu gün” mövzusunda dəyirmi masa keçirilib.
“İki sahil” xəbər verir ki, tədbirdə idarə, müəssisə və təşkilat rəhbərləri, ərazi partiya təşkilat sədrləri, partiya fəalları, ictimaiyyət nümayəndələri iştirak ediblər.
Tədbir iştirakçıları əvvəlcə Ümummilli Lider Heydər Əliyevin və vətənimizin ərazi bütövlüyü uğurunda canlarından keçmiş şəhidlərimizin əziz xatirəsini bir dəqiqəlik sükutla yad ediblər.
Tədbirdə Kürdəmir rayon İcra Hakimiyyətinin şöbə müdirinin müavini Daşqın Rüstəmov çıxış edərək bildirib ki, Azərbaycanın xilaskarı, Ümummilli Lider Heydər Əliyevin 1969-cu il iyul ayının 14-də hakimiyyətə gəlişi ölkəmizin siyasi-iqtisadi, mədəni və həmçinin sosial həyatının yüksək səviyyədə inkişafına səbəb oldu. Bu inkişafı ölkə əhalisinin bütün təbəqələri hiss etdi, gördü. Azərbaycanda zavodların, fabriklərin, müəssisələrin fəaliyyətə başlaması, yeni iş yerlərinin açılması Heydər Əliyevin adı ilə bağlıdır. Ulu Öndərimizin xalqına olan sevgisi, bağlılığı hər bir insan üçün nümunə olmalıdır. Onun millətinə və vətəninə olan bu sevgisi daima xalqının mənafeyinə, milli maraqlara uyğun şəkildə qərar verməsində, Azərbaycanın müstəqilliyi uğrunda göstərdiyi misilsiz xidmətlərdə özünü göstərirdi. Ümummilli Lider Heydər Əliyev cənab İlham Əliyevə Özü qədər inandığını bəyan etmişdir. Müzəffər Ali Baş Komandan İlham Əliyev haqqa, ədalətə söykənən bu istəyi gerçəkliyə çevirdi, torpaqlarımızın azadlığına qovuşmasına və üçrəngli bayrağımızın işğaldan azad edilmiş ərazilərimizdə dalğalanmasına nail oldu.
Çıxışçılardan “Ulu Öndər Heydər Əliyevin 14 iyulda hakimiyyətə gəlişi Azərbaycan dövlətçiliyinin əsasını qoydu” mövzusunda Yeni Azərbaycan Partiyası Kürdəmir rayon təşkilatı aparatının məsləhətçisi Nurlan Şəfiyev, “Müstəqilliyə doğru böyük dönüş və milli oyanışın başlanması ” mövzusunda Kürdəmir “Gənclər evi” Sosial Xidmət müəssisəsinin direktoru Nicat Ağarəhimov, “Azərbaycanın gələcəyi uğrunda yorulmaz fəaliyyət” mövzusunda Kürdəmir rayon Heydər Əliyev Mərkəzinin elmi işçisi Gülsüm Qənbərova, “Azərbaycan cəmiyyəti Heydər Əliyevin rəhbərliyi altında böyük dəyişikliklərin şahidi oldu” mövzusunda Kürdəmir rayon Mərkəzi Kitabxanalar Sisteminin əməkdaşı Məhinə Şirəliyeva vurğulayıblar ki, ölkənin inkişafı onun iqtisadiyyatının güclü olması ilə bağlıdır. Ulu Öndər Heydər Əliyev də iqtisadiyyatın inkişafına xüsusi önəm verərək bugünkü güclü iqtisadiyyatımızın təməlini qoydu. 1969-cu ildən etibarən 1982-ci ilə qədər ölkədə milli gəlirin xeyli artması, kənd təsərrüfatı məhsullarının, sənaye istehsalının və digər istehsal sahələrindəki artımın müşahidə olunması iqtisadiyyatın sürətli inkişafının sübutudur. Ulu Öndər Heydər Əliyev ölkəmizə rəhbərliyinin birinci dövründə, bütün sahələrdə olduğu kimi, təhsil sahəsinə də diqqət və qayğı göstərdi. Ümummilli Liderimizin rəhbərliyi altında yeni məktəblər inşa olundu, maddi-texniki baza formalaşdırıldı və bir çox tədbirlər həyata keçirildi. Azərbaycan müstəqillik qazandıqdan sonra 1993-cü ildə xalqın istəyi ilə hakimiyyətə qayıdan Ulu Öndər Heydər Əliyev Azərbaycanı çətin vəziyyətdən qurtardı və bütün dünyada tanıtdı. Ölkəmiz günü-gündən inkişaf etdi və bütün sahələrdə uğurlar qazandı. Dövlətçilik salnaməmizdə silinməz izlər qoymuş, azərbaycanlı olması ilə ömür boyu fəxr etmiş, milli qürur və iftixar mənbəyimiz olan dahi şəxsiyyət dahi Heydər Əliyev bütün dünyada müstəqil, müasir Azərbaycanın memarı olaraq qəbul edilir.
