İsrail Hərbi Hava Qüvvələri Latakiya və Cəbəl bölgələrində Suriya ordusunun bazalarına zərbələr endirib…
İsrail Hərbi Hava Qüvvələrinin qırıcı təyyarələri səhər tezdən Suriyanın şimal-qərbində hökumət qüvvələrinin bazalarına hava zərbələri endirib.
Poliqon xəbər verir ki, bu barədə Al Mayadeen telekanalı məlumat yayıb.
Hücumlar 132-ci motoatıcı briqadanın yerləşdiyi Latakiya şəhərinin ətraflarında, həmçinin Cəbəl şəhərindəki 107-ci zirehli briqadanın bazasına endirilib. Hava əməliyyatlarının nəticələri və mümkün itkilər barədə əlavə məlumat verilməyib.
16 iyul tarixində İsrail Hərbi Hava Qüvvələri Dəməşq və ətrafındakı bir sıra strateji obyektlərə, o cümlədən Suriya ordusunun Baş Qərargah kompleksi və Prezident sarayına zərbələr endirmişdi. Son hücumlar gecə saatlarında Dəməşqin qərbində yerləşən Mezza hərbi hava limanı və El-Muadamiya qəsəbəsinə edilmişdir.
Çərşənbə günü İsrail pilotsuz təyyarələri keçid hökumətinin daxili işlər nazirliyinin xüsusi təyinatlı dəstələrinin konvoyunu Əs-Suveyda şəhərinin yaxınlığında atəşə tutub. Telekanalın məlumatına görə, bu hücum nəticəsində 15-dən çox döyüşçü həlak olub və yaralanıb.
İsrailin müdafiə naziri İsraəl Kac əvvəlcədən xəbərdarlıq etmişdi ki, Suriyanın Əs-Suveyda və ətraf bölgələrdəki qoşunlarını geri çəkmədiyi təqdirdə İsrail Suriyaya zərbələr endirməyə davam edəcək.
Poliqon.info
