.jpg)
Olaylar.az xəbər verir ki, "Tashir" Qrupunun vitse-prezidenti, "Ermənistan Elektrik Şəbəkələri" QSC-nin Direktorlar Şurasının sədri Narek Karapetyan hökumətin "Facebook" səhifəsindəki açıqlamasına münasibət bildirərək qeyd edib:
"Sizin məhkəməyə mövqeyinizi təqdim etmək imkanınız var idi, lakin bu mövqe əsassız sayıldı".
O, hakimiyyəti Avropa dəyərlərinə əsaslanmağa və məhkəmənin qanuni qərarını tezliklə icra etməyə çağırıb.
Xatırladaq ki, daha əvvəl iş adamı Samvel Karapetyan Ermənistan hökumətinə qarşı beynəlxalq arbitrajda - Stokholm Ticarət Palatası nəzdindəki Arbitraj İnstitutunda "Ermənistan Elektrik Şəbəkələri" QSC-nin milliləşdirilməsi ilə bağlı iddianı qazanmışdı.
Ermənistan hökuməti isə məsələ ilə bağlı yaydığı açıqlamada bildirmişdi ki, arbitrajın 22 iyul 2025-ci il tarixli qərarı (EA 2025/121) müvəqqəti idarəçinin təyinatı və onun fəaliyyət dairəsi ilə bağlı məqsədlərdən fərqlənir. Qeyd olunub ki, müvəqqəti idarəçi təyin olunmasının məqsədi enerji böhranının bilərəkdən yaradılması riskinin qarşısını almaq, ictimai asayişi qorumaq, dövlət təhlükəsizliyinə təhdid yaradan potensial riskləri aradan qaldırmaq və mümkün sui-istifadə hallarını önləməkdir.
Bəyanatda vurğulanıb ki, Ermənistan xarici arbitrajların qərarlarına hörmətlə yanaşır, lakin bu qərarların icrası Ermənistan Respublikasının qanunvericiliyinə və müvafiq beynəlxalq müqavilələrə uyğun şəkildə həyata keçirilməlidir.
