Çin Qərbin sanksiyalarından yayınmaq üçün “sənaye soyuducu qurğular” adı altında Rusiyada dövlətə məxsus pilotsuz təyyarə istehsalçısına ön şirkətlər vasitəsilə gizli şəkildə mühərriklər verir.
Publika.az xəbər verir ki, bu barədə “Reuters” üç avropalı təhlükəsizlik rəsmisinin məlumatlarına və sənədlərinə istinadən yazıb.
Onların sözlərinə görə, bu tədarüklər Rusiyanın silah istehsalçısı “IEMZ Kupol”-a şirkətin təchizat zəncirini pozmaq üçün oktyabr ayında ABŞ və Aİ-nin tətbiq etdiyi sanksiyalara baxmayaraq, “Garpiya-A1” hücum dronlarının istehsalını artırmağa imkan verib.
Xüsusilə, daxili Kupol sənədi göstərir ki, şirkət Rusiya Müdafiə Nazirliyi ilə 2024-cü ildəki 2000 ədəddən bu il 6000-dən çox “Garpiya” istehsalı ilə bağlı müqavilə imzalayıb. Sənəddə deyilir ki, aprel ayına qədər 1500-dən çox pilotsuz təyyarə gətirilib.
"Uzun mənzilli dronlardan Ukrayna ərazisinin dərinliklərində mülki və hərbi hədəflərə hücum etmək üçün istifadə olunur. Rusiya ayda təxminən 500 belə pilotsuz təyyarədən istifadə edir", - Ukraynanın hərbi kəşfiyyat agentliyi “Reuters”-ə açıqlamasında bildirib.
