İngiltərənin “Aston Villa” klubu yarımmüdafiəçi Boubacar Kamara ilə yeni müqavilə imzalayıb.
90deqiqe.Az klubun rəsmi saytına istinadən xəbər verir ki, 24 yaşlı futbolçu ilə razılaşma 2030-cu ilin yayınadək qüvvədə olacaq və növbəti beş mövsümü əhatə edir.
Kamara “Aston Villa”ya 2022-ci ilin yayında “Marsel”dən azad agent kimi transfer olunmuşdu. O zamandan bəri komandanın əsas fiqurlarından birinə çevrilən futbolçu indiyədək klubun heyətində 97 rəsmi oyuna çıxıb, 2 qol və 2 məhsuldar ötürmə ilə yadda qalıb.
Unai Emerinin rəhbərliyi altında uğurlu çıxışını davam etdirən “Aston Villa” ötən Premyer Liqa mövsümünü 6-cı pillədə tamamlayaraq 2025/2026 mövsümündə Avropa Liqasında iştirak hüququ qazanıb.
Kamaranın uzunmüddətli bağlılığı klubun gələcək planlarında ona xüsusi yer verildiyini göstərir.
