Amerikalı iş adamı və sosial media mütəxəssisi Gary Vaynerchuk dünyanın ən nüfuzlu marketinq mütəxəssislərindən biri hesab olunur.
Valyuta.az xəbər verir ki, o, atası ilə birgə idarə etdiyi "Wine Library" adlı içki dükanını sadə bir "YouTube" layihəsi – "Wine Library TV" vasitəsilə qlobal səviyyəyə çatdıraraq, biznesin illik gəlirini 3 milyon dollardan 60 milyon dollara qədər artırıb.
Gary-nin əsas uğur strategiyası sosial media platformalarında real vaxtda dürüst və səmimi məzmun yaratmaq, izləyicilərlə daim əlaqədə olmaq və onlara satış deyil, dəyər vermək üzərində qurulub. Bu prinsip onun şəxsi brendinin formalaşmasında və güclənməsində əsas rol oynayıb
"Wine Library TV" platformasında o, elit və qapalı şərab dünyasını daha geniş kütləyə çatdırmaq üçün mürəkkəb terminologiyanı bir kənara qoyaraq, hər kəsin başa düşə biləcəyi sadə və əyləncəli dildə danışmağa başladı. Bu, həm izləyici sayını artırdı, həm də insanlarda onun dürüstlüyünə inam yaratdı
İzləyicilər özlərini “Vayniacs” adlandıraraq onun ətrafında bir cəmiyyətə çevrildi. Gary isə onları yalnız potensial müştəri deyil, real icma kimi qəbul etdi
Gary Vaynerchuk-un əsas strategiyası aşağıdakı üç prinsip üzərində qurulub
"Underpriced attention" – reklam və məzmunun hələ tam dəyərləndirilmədiyi platformalarda tez mövqe tutmaq
"Storytelling" – satışdan daha çox, məhsul və brend ətrafında maraqlı və emosional hekayələr danışmaq
Davamlılıq – gündəlik, ardıcıl məzmun paylaşmaqla izləyicilərin inamını qazanmaq
O, bir çox sahibkar və marketoloqa tövsiyə edir ki, marketinq yalnız kampaniya və reklamla məhdudlaşmamalıdır. Əsas hədəf uzunmüddətli etibar qazanmaq və brendin arxasında dəyərli bir hekayə qurmaqdır
Gary Vaynerchuk-un beş əsas məsləhəti
Satmaq əvəzinə dəyər verin – izləyiciləriniz sizi reklam vasitəsi yox, dəyər mənbəyi kimi görsün
Platformaları erkən kəşf edin – yeniliklərə açıq olun, zamanında adaptasiya edin
Səmimi olun – müştəri ilə münasibətdə dürüstlük ən güclü marketinq alətidir
İcma yaradın – izləyicilərinizlə daimi əlaqədə olun, onları sadəcə auditoriya kimi deyil, brendin bir parçası kimi görün
Davamlı məzmun yaradın – sabitlik və təkrarlanma etibar formalaşdırır
Gary Vaynerchuk-un uğuru bir daha göstərir ki, rəqəmsal dünyada fərqlənmək üçün yüksək büdcəyə deyil, doğru strategiyaya ehtiyac var. Dəyər yaratmaq, şəffaf olmaq və insanlarla səmimi münasibət qurmaq – bu, həm şəxsi brendin, həm də biznesin davamlı inkişafına zəmin yaradır.
Mayya Hüseynova
