ABŞ-ın nüfuzlu ali təhsil müəssisələrindən biri olan Kolumbiya Universiteti, yəhudi tələbələrini qorumaqda uğursuzluğa yol verdiyi iddiaları ilə bağlı keçmiş prezident Donald Trampın administrasiyası ilə 200 milyon dollarlıq (təxminən 340 milyon manat) təzminat ödəməklə bağlı razılaşma əldə edib.
Bu barədə News24.az BBC-yə istinadən məlumat verir.
Üç il ərzində mərhələli şəkildə ödəniləcək məbləğ qarşılığında federal hökumət, mart ayında dondurduğu və ya dayandırdığı 400 milyon dollar dəyərində qrantların bir hissəsini bərpa etməyə razılaşıb.
Universitet ötən il Qəzza müharibəsinə etirazlar fonunda antisemitizmi önləməkdə kifayət qədər tədbir görməməkdə ilk ittiham olunan təhsil ocağı olmuşdu. Mart ayında artıq Ağ Evin irəli sürdüyü bir sıra tələbləri qəbul etmişdi.
Təhsil naziri Linda McMahon razılaşmanı “ölkəmizdə universitetlərin məsuliyyətə cəlb olunması baxımından mühüm dönüş nöqtəsi” adlandırıb. Universitetin müvəqqəti prezidenti Claire Shipman isə razılaşmanın federal nəzarət və qeyri-müəyyənlik dövründən sonra "irəliyə doğru mühüm addım" olduğunu bildirib.
Razılaşmaya əsasən:
Universitetin Yaxın Şərq tədqiqatları departamenti yenidən təşkil olunacaq;
Kampusda “xüsusi zabitlər” qrupu yaradılacaq;
Qəzza etirazlarında iştirak edən tələbələr cəzalandırılacaq;
Etirazlarda maska taxılması qadağan ediləcək və kampus vəsiqəsi tələb olunacaq;
Tələbə təşkilatlarına nəzarət artırılacaq;
Kampusda təhlükəsizlik qüvvələrinin sayı artırılacaq.
Donald Tramp sosial şəbəkədə qeyd edib ki, Kolumbiya Universiteti həmçinin DEI (müxtəliflik, bərabərlik və inklüzivlik) siyasətini dayandırmağa, yalnız istedada əsasən tələbə qəbuluna və tələbələrin hüquqlarının qorunmasına razılaşıb.
Kolumbiya razılaşmanın günahın etirafı olmadığını vurğulayıb. Bu arada, Harvard Universiteti fərqli mövqe sərgiləyərək, administrasiyanı məhkəməyə verib.
Rəsmilər hesab edir ki, Kolumbiyanın bu addımı digər elit universitetlər üçün də “yol xəritəsi” ola bilər.
Xeyrənsə Piriyeva
