Bizimyol portalından verilən məlumata görə, ain.az xəbər yayır.
Elmi, sosial, siyasi yazıları ilə tanıdığımız məşhur alim, Lütfi Zadə adına Beynəlxalq Müasir Elmlər Akademiyasının həqiqi üzvü Nemət Məmmədlinin poetik ifadələri.Düşünün öz dilimizdə
Çoxu gedib, azı qalıb,
Yazı gedib, qışı qalıb.
Nuru gedib gözümüzün,
Zayı çıxıb ömrümüzün.
Düşünərək danışmışıq,
Halal-haram axtarmışıq.
Əsiriyik özümüzün
Kəsəri yox sözümüzün.
Hamı kefdə-damaqdadır,
Satmaqdadır, almaqdadır.
Yumaqdadır, asmaqdadır,
Calağı çox ipimizin.
Düz danışıb danlanmışıq,
Yaradana yalvarmışıq,
Qəndilindən sallanmışıq,
Gün görməmiş qocalmışıq.
Oxumuşuq, çalışmışıq,
Dərs vermişik, dərs almışıq.
Ən dəyərli vaxtımızda
Oyundan kənar qalmışıq.
Mürgülədir zaman bizi,
İtiririk yolu, izi.
Tərk eləsək bir gün sizi
İtirməyin səmtinizi.
Ayıq olun, sayıq olun,
Kökünüzə layiq olun.
Təmizləyin qəlbinizi
Cilovlayın nəfsinizi.
Qiymət qoyun özünüzə,
Yiyə durun dilimizə.
Yad dillərdə danışsaz da,
Düşünün öz dilimizdə.
10.01.2025
Adam-badam iysi gəlir
Zaman keçir, tarix yazır
Olanlar da nağıllanır,
Yaddaşlarda, təfəkkürdə,
Bir az itir, bir az qalır.
Olmuşları çözələmək,
Dərk eləmək, bizə qalır.
Müzakirə, mübadilə,
Mülahizə, mübaliğə.
Damla-damla, gilə-gilə,
Vüsət alıb qanadlanır.
Adam-badam iysi gəlir,
Yağlı, badam iysi gəlir.
Aç, qapını-pəncərəni
Qəbul elə, gör kim gəlir?
Əgər qadir insandırsa,
Qoy göstərsin hünərini,
Düşüncəsin işə salsın
Təfəkkürün cilalasın.
Söykənərək keçmişinə
Nur gətirsin yaddaşına.
Danışmasın qarasına,
Olmuşların, keçmişlərin,
Bizdən əvvəl getmişlərin,
Dünya ağıl meydanıdır,
Haqsızlığın divanıdır.
Kim düz bilir, qoy danışsın,
İnsanlar düzə alışsın,
Yalan qalsın keçmişlərdə,
Yalan dolu dərsliklərdə.
Kim düz deyir qoy yüksəlsin.
Hamı ağlına söykənsin.
Ağıllılar çıxsın önə,
Qüdrətlənsin gündən-günə.
Yaddaşımız vərəqlənir,
Adam-badam iysi gəlir,
Tariximiz çox zəngindir,
Qəhrəmanlar sərgilənir.
Cavanşir də, Babək də,
Duyğumuzda bədirlənir.
Həzi, Mehdi, Hüseynbala
Ruhumuza nur çiləyir.
Ölkəmizin iftixarı
Fransanın partizanı
Faşistlərin baş ağrısı
İlahidən bir hədiyyə
Gəlir Deqol Əhmədiyyə.
Şəki sanki qanadlanır
Oxud kəndi rahatlanır,
Həm sevinir, həm ruhlanır.
Bəs sonrası, indi necə?
İndi zaman bir başqadır.
İndi parfum zamanıdır.
Nə adamın iysi gəlir,
Nə badamın iysi gəlir.
Divlər yatır, mürgüləyir
Sözçülər divlik eləyir.
Asır-kəsir, dümələnir.
Millət baxır məzələnir.
25.05..2025
Bu günün mənzərəsi
Çox yaşadıq, çox gördük,
Çox gördük, çox götürdük.
Ömrümüz sona yetdi,
Çox məqamlar ötürdük.
Ağzından od tökəni,
Sərhədləri sökəni,
Millətləri böləni,
Həm tanıdıq, həm gördük.
İndi zaman başqadır,
Bosslar çaşqa-loşkadır.
Dünya qalıb nigaran,
Dirijorlar başqadır.
Mən də yol ayrıcında,
Uca dağ yamacında.
Ayrı düşüb qalmışam,
Həsrətdən yorulmuşan.
İnamımdan dönmürəm,
Nicat yolu görmürəm.
Özümdə anlamıram,
Qocalıram, sönmürəm.
Demək nəsə olacaq,
Dünya təlatümdədir.
Bütün körpülər yanıb,
Əzrail həşirdədir.
Şeytanlar iş başında,
İtir, bitir qarşında,
Halala haram qatır
Hər an ocaq başında.
Yaradan göydən baxır,
İşlərin gedişinə,
Vurdurur insanlara
Yumurtanı dişinə.
Yumurtalar cürbəcür,
Bərki də var, boşu da.
Güclülərdə lax çıxır,
Yaxşıları qonşuda.
Odur ki, güclülərin,
Gözü qonşulardadır.
Müharibə labüddür.
Təqsir yumurtadadır.
Yəni kökdən gələni,
Sözlə pərdələnəni,
Xahişlə açmaq olmaz,
Taledən qaçmaq olmaz.
"Bacarana baş qurban",
Uzun sözün kəsəsi,
Buradan bəhrələnir,
Bu günün mənzərəsi.
Çalışaq ayıq olaq,
Hər zaman sayıq olaq,
Tarixi unutmayaq,
Özümüzə qayıdaq!
Özümüzə qayıdaq!
13-23.06.2025.
Nemət Məmmədli,
Lütfi Zadə adına Beynəlxalq Müasir Elmlər Akademiyasının həqiqi üzvü
Ən son xəbərləri və yenilikləri almaq üçün ain.az saytını izləyin.
