İtaliyanın “Torino” klubunun polşalı müdafiəçisi Sebastyan Valukeviç bundan sonra “Sassuolo”nun uğurları üçün çalışacaq.
Arena.az bu barədə “Sassuolo”nun rəsmi saytına istinadən məlumat verir.
Sözügedən klub 25 yaşlı mərkəz müdafiəçisini 1 illik icarə müqaviləsi əsasında heyətinə qatıb. “Sassuolo” bir mövsümlük icarə üçün “Torino”ya 1 milyon avro ödəyib.
Xatırladaq ki, Sebastyan Valukeviç 2024-cü ilin avqustunda A Seriyasının digər təmsilçisi “Empoli”dən 4,7 milyon avro müqabilində “Torino”ya keçmişdi. Polşalı futbolçunun Turin klubu ilə 2027-ci ilin 30 iyununadək müqaviləsi mövcuddur. O, geridə qalmış mövsümdə “Torino”nun heyətində 30 oyuna çıxıb.
Valukeviç “Legiya”nın yetirməsidir. Polşada “Poqon”un da formasını geyinmiş müdafiəçi İtaliyada 4 il “Kalyari”nin, 1 il “Empoli”nin uğurları üçün çalışıb.
Valukeviç 2020-ci ilin oktyabrında debüt etdiyi Polşa yığmasında da 10 oyun keçirib, 1 qol vurub.
“Transfermarkt” internet-portalı 25 yaşlı müdafiəçinin transfer dəyərini 4,5 milyon avro məbləğində qiymətləndirir.
