Niderland dünya bazarını bütün il boyu təzə gül-çiçəklə təmin edir. Həm də od qiymətinə. Xarici ölkələr isə sanki öz ərazilərində gül becərə bilmirlərmiş kimi, Amsterdamdan gül idxal edirlər. O cümlədən, içi Azərbaycan qarışıq, MDB ölkələri də ilin dörd fəsli Niderlanddan təzə güllər almaqdadır. Amma son illər ən azı MDB respublikalarının gül bazarında yeni təminatçı yaranıb – Çin.
Hafta.az-ın yazdığına görə, Şimal-Qərb Çindən təzə kəsilmiş qızılgüllər coğrafi əhatəsini ölkədaxili bazardan xarici bazarlara qədər genişləndirməyə davam edib. Belə ki, Qansu əyalətinin Linxia Hui Muxtar Prefekturasının Linxia şəhərinin istixanalarından təzə kəsilmiş qızılgüllərin Qazaxıstanın Almatı şəhərində istehlakçılara çatdırılması ən qısamüddətə başa gəlir- ətirli çiçəklər toplandığı andan cəmi 48 saat ərzində Almatıya çatdırılır.
Dəniz səviyyəsindən orta hündürlüyü 2 min metr olan Linxia Hui Muxtar Prefekturası günəş işığının bolluğu və quru iqlimi sayəsində yüksək keyfiyyətli qızılgül yetişdirilməsi yerinə çevrilib.
Linxia şəhərində İnun Beynəlxalq Çiçək Limanı Şirkətinin (bundan sonra İnun Şirkəti adlandırılacaq) aqrofermasında “ağıllı” istixanalarda qızılgüllər il boyu çiçək açır. Bu, müasir texnoloji avadanlıqlar, o cümlədən avtomatik ventilyasiya və temperatur nəzarət sistemləri, suvarma və dezinfeksiya üçün su və gübrə inteqrasiyası texnologiyasına malik sistem sayəsində mümkün olub ki, bu da il boyu dayanıqlı və səmərəli gül yetişdirilməsinə kömək edir.
Hazırda bu şirkət 8 müxtəlif çalarlardan ibarət rəng palitrası olan 10 növ qızılgül yetişdirir. Gündəlik istehsal həcmi 180 min ədədə çatır, çiçək məmulatlarının illik istehsal həcmi isə 60 milyon ədədi keçir. Bu təzə kəsilmiş qızılgüllər həm Çinin böyük şəhərlərinə, həm də xaricdə satılır.
Qansu Hauzhizhou İqtisadiyyat və Ticarət Şirkəti /"Güllər Krallığı"/ yuxarıda qeyd olunan kənd təsərrüfatı fermasında yetişdirilən təzə kəsilmiş qızılgüllərin satışı ilə məşğul olur. Hauzhizhou baş direktorunun müavini Li Zetyanın sözlərinə görə, Yinonq kənd təsərrüfatı fermasının qızılgül məhsulları yüksək keyfiyyətlidir. Xüsusilə, bu qızılgüllər adi çiçəklərdən 3-5 gün daha çox təravətini saxlayaraq vazada uzun müddət solmadan qalır. Bu keyfiyyət "Linxia gülləri"ni beynəlxalq bazarda rəqabətədavamlı edir.
"Bir kəmər, bir yol” təşəbbüsü çərçivəsində bazar araşdırması zamanı müəyyən etdik ki, Qazaxıstanda Çin çiçəklərinə tələbat kəskin şəkildə artıb. Bu, əməkdaşlıq üçün geniş perspektivlər açır", - Li Zetyan bildirib. Onun sözlərinə görə, şirkət təzə güllərin dayanıqlı tədarükü mənbələrinə malikdir və o, gömrük rəsmiləşdirilməsi, anbarların idarə edilməsi və regional logistika şəbəkəsi sahəsində Almatının üstünlüklərindən səmərəli istifadə edə bilir.
Huazhizhou-nun son məlumatlarına görə, bu ilin birinci yarısında Qazaxıstan, Qırğızıstan və digər Mərkəzi Asiya ölkələrinə 1,5 milyon ədəd təzə kəsilmiş qızılgül ixrac edilib.
Li Zetyanın sözlərinə görə, şirkət artıq ilkin müştəri bazasını formalaşdırıb və bu il iyul ayının ikinci ongünlüyündə qazaxıstanlı tərəfdaşlarla əməkdaşlıq çərçivəsində Almatıda xarici anbar yaradılıb. Bundan əlavə, şirkət təkcə Mərkəzi Asiya ölkələrini deyil, həm də Rusiya və digər Şərqi Avropa ölkələrinin bazarına çıxmaqla öz məhsullarının satış bazarını genişləndirmək məqsədilə Almatıda filialının yaradılmasını da tədricən təşviq edir.
"Çin bazasından birbaşa tədarük və xaricdəki anbar vasitəsilə paylama" satış modeli "Linxia qızılgüllərini" birbaşa xarici istehlakçılara çatdırmağa imkan verir. Linxia Şəhər Kənd Təsərrüfatı və Kənd İşləri Departamentinin rəsmisi Lonq Şanqinin sözlərinə görə, yerli kənd təsərrüfatı idarələri mütəmadi olaraq müəssisələrə çiçək və bitkilərin yetişdirilməsi ilə bağlı texniki məsləhətlər verir. Ümid edirik ki, transsərhəd əməkdaşlıq Çin çiçək mədəniyyəti ilə Mərkəzi Asiya ölkələrinin bağçılıq təcrübəsi arasında mübadiləni dərinləşdirmək üçün platformaya çevriləcək", - o vurğulayıb.
