ain.az bildirir, Kulis.az portalına istinadən.
Kulis.az Ülviyyə Lalənin şeirlərini təqdim edir.
***
Ayaq dırnaqlarımı qırmızıya boyadım,
albalıya oxşadı.
Nə gözəl rəssammışam.
Bəlkə sənin surətini də
köçürüm ürəyimə?
***
Gəl, günortanın istisində görüşək
və həyəcandan tərləyəndə
ataq havanın üstünə...
***
Bəşəriyyəti bətnində daşıyan qadın
özünə bəzək verir —
gah dodağını, gah dırnağını boyayaraq.
Maykl Cekson kimi
o da inanmır öz möhtəşəmliyinə.
Biri irqçiliyin,
Biri cinsiyyətçiliyin yükünü daşıyır çiyinlərində...
***
Nənəm siqaret çəkməyib,
dərd çəkib —
altı qızına ər tapmaq dərdi.
Öz sözüdür.
Nənəm siqaretin deyil,
təndirə çörək yapanda,
yemək bişirəndə —
ocağın tüstüsünə boğulub.
"Siqaret çəkmək sağlamlığa zərərdir"
təndirin üstünə yazılmayıb
siqaret qutusuna yazıldığı kimi.
Bəh-bəhlə yemişik təndir çörəyini,
ocaqda bişirilmiş yeməyi,
həm də nənəmin ömrünü —
tüstü ilə.
***
Niyə sevgi şeiri yazmırsan?-
soruşur kişi şairlər.
Sevgini qadağan edib
atam ağlım kəsəndən.
Sevmək başaşağılığı gətirər atama,
mənə,
bütün qohum-əqrəbama,
"Sevgi" sözü qadağan edilib,
yoxdur leksikonumda –
günah kimi,
ayıb kimi,
“qadağan edilmiş kitab” kimi...
***
Mən kaktusam.
Çiçək açmadım
sən gedən gündən.
Yekaterina kimi
hərəmxana qurmuşam
yalqızlığımdan.
Özümə cəza verirəm,
kədərimdən həzz alıram
öz acığıma.
***
Əsrlər boyu
şəninə tərif deyib,
mədh ediblər
əndamını, yerişini, duruşunu
əsir etdikləri qadının...
Şirin söz nəyə gərək
azad deyilsə qadın.
Xəyalı göylərdədir,
vücudu yanında olsa,
nə fayda.
***
Öldürürəm səni
gündə min dəfə
öz xəyalımda...
Sonra oturub şeir yazıram
sevgidən.
İnsanları qətlə yetirib
məhəbbət şeirləri yazan
hökmdarlar kimi.
***
Şərq qadını —
əlində fırça,
üzünə çəkir rəngləri...
Ənlik, kirşan —
təmas edir iztirabın alt qatına.
Ağarmış dodaqlarını —
qanla yox, boya ilə qızardır.
Kimyəvi bir boya ilə
gizlədir anemiyanı.
Qırılmış dırnaqlarını yapışdırır,
saçına qaynaq bağlayır —
belə gizlədə bilir
bədənində çatışmayan D vitamini günəşini.
O boyanır —
üzünüz ağ olsun deyə.
Qaralır içi,
parlayır çölü.
O bir günəşdir —
günəşsiz qalsa da, işıq saçan,
həsrət içində
özünü yandıran qadın.
“Ölü Həsən” filmi müsabiqədə qalib oldu
"Anadolu" Agentliyi: Azərbaycan mediasının 150 illik yolu - “Əkinçi”dən Şuşaya qədər - Vüsalə Mahirqızı
Lady Qaqa milyarderdən 6 milyon dollar tələb edib?
Daha ətraflı məlumat və yeniliklər üçün ain.az saytını izləyin.
