“ChatGPT” botu ilə yazışma məhkəmə tələbi əsasında açıqlana bilər.
Yeniavaz.com xəbər verir ki, bu barədə “OpenAI”nin baş direktoru Sem Altman istifadəçilərə xəbərdarlıq edib.
Altman bildirib ki, getdikcə daha çox insan çatbotdan terapevt kimi istifadə edir, lakin şəxsi və ya psixoloji mövzularda bu cür söhbətlər həkim məxfiliyi ilə qorunmur:
“Əgər siz “ChatGPT” ilə şəxsi məsələlər haqqında danışırsınızsa və sonra məhkəmə və ya buna bənzər bir şey varsa, biz bunu təmin etməyə məcbur ola bilərik və məncə, bu, çox yanlışdır”.
“ChatGPT”nin təsisçisi çatbot ilə söhbətlərin həkim və ya hüquqşünasla məsləhətləşmələrlə eyni səviyyədə məxfilik ilə qorunmalı olduğu fikrini bildirib.
Qeyd edək ki, “ChatGPT”nin siyasətinə görə, istifadəçinin sildiyi çatbot ilə bütün söhbətlər, şirkətdən “hüquqi və ya təhlükəsizlik səbəbləri” ilə onları saxlamaq tələb olunmadığı halda, 30 gün ərzində həmişəlik silinir. Eyni zamanda, “OpenAI” əməkdaşları yazışmaları oxuya, o cümlədən modeli sazlaya və zərərli istifadəni aşkarlaya bilərlər.
