Arktikada təbii radioaktivliyin artması qeydə alınıb - Novaya Zemlya arxipelaqında radonun səviyyəsi bir il əvvəlkindən təxminən iki dəfə yüksək olub. Bu barədə TASS Rusiya Elmlər Akademiyasının Ural Bölməsinin (FITSKİA) Arktikanın Kompleks Tədqiqi Federal Tədqiqat Mərkəzinin ekoloji radiologiya laboratoriyasının rəhbəri Yevgeniya Yakovlevaya istinadən məlumat verib.
Alimlər hesab edirlər ki, radonun səviyyəsinin artması əbədi donmuş torpaqların əriməsi ilə bağlıdır. Adətən, donmuş süxurlar bu radioaktiv qazı saxlayır, lakin qızdırıldıqda səthə qalxır.
Radon uranın parçalanması zamanı əmələ gələn rəngsiz və qoxusuz radioaktiv qazdır. Bütün dünyada torpaqlarda və qayalarda rast gəlinir. Arktikada onun konsentrasiyası adətən çox aşağı olur. Bununla belə, tədqiqatçıların qeyd etdiyi kimi, aşkar edilmiş radonun səviyyələri təbii dəyərlər həddindədir və insanların sağlamlığı üçün təhlükə yaratmır.
Təhlil üçün tədqiqatçılar süxurlardan nümunələr götürüblər. Bu, onlara qazın nə qədər dərin olduğunu və donmuş torpağın nə qədər əridiyini anlamağa kömək edəcək. Alimlərin fikrincə, bu cür məlumatlar bu bölgədə əbədi donun əriməsinin sürətləndiyini göstərə bilər.
İyulun əvvəlində Arktika və Antarktika Elmi Tədqiqat İnstitutunun direktoru Aleksandr Makarov bəyan edib ki, rusiyalı alimlər Antarktidanın dərinliklərindən yaşı 1,2 milyon ildən çox olan qədim buzları qaldırmağı planlaşdırırlar ki, bu da qitənin iqliminin necə inkişaf etdiyini öyrənməyə kömək edəcək.
