Biləsuvar
Rayon İcra Hakimiyyəti və Şirvan-Salyan Regional Gənclər və İdman İdarəsinin
birgə təşkilatçılığı ilə 5 kilometr məsafəyə
qaçış üzrə rayon birinciliyi keçirilib.
200 nəfərdən
çox iştirakçının mübarizə apardığı yarışlara rayonun Xırmandalı kəndinin giriş
hissəsindən start verilib. Qaçış zamanı Heydər Əliyev parkında qurulmuş finiş xəttinə
birinci və ikinci olaraq Nəsimi kənd sakinləri Seymur Hüseynov və Tacəddin Fətullayev,
üçüncü isə Çaylı kənd sakini Qadir Həmidli
çataraq yarışın qalibi olublar.
Mükafatlandırılma
mərasimində iştirak edən rayon icra hakimiyyətinin başçısı Faiq Qürbətov qalibləri
təbrik edərək onlara uğurlar arzulayıb. Bildirib ki, Azərbaycan Prezidenti İlham Əliyevin həyata keçirdiyi
uğurlu dövlət siyasəti nəticəsində respublikamızın bütün bölgələrində olduğu
kimi, Biləsuvarın da sosial-iqtisadi və mədəni həyatında, dövlət idarəçiliyində
gənclər uğurla təmsil olunurlar.
Tədbirdə
Şirvan-Salyan Regional Gənclər və İdman İdarəsinin rəisi Aydın Yusifov və idarənin
Biləsuvar sektorunun rəisi Azad Quliyev çıxış edərək Gənclər və İdman
Nazirliyinin yaradılmasının 31 illiyi ilə əlaqədar görülən işlərdən, idmanın
inkişafına təkan verən tədbirlərdən danışaraq idmançılara uğurlar arzulayıblar.
Sonra
qaliblərə medallar, fəxri fərmanlar və hədiyyələr təqdim olunub, xatirə şəkilləri
çəkilib.
"Azərbaycan"
