Müntəzəm məşq etmək bədən çəkisinin idarə olunmasına, əzələ və sümük sağlamlığının güclənməsinə töhfə verir. Lakin daha yüksək nəticələr əldə etmək üçün düzgün qidalanma da ən az məşq qədər vacibdir.
Pravda.az xəbər verir ki, bədənin ehtiyaclarına uyğun qidalarla qidalanmaq, idman performansınızı əhəmiyyətli dərəcədə artıra bilər.
Proteinlə zəngin qidalar seçin
Əzələ inkişafını dəstəkləmək və enerji təmin etmək üçün protein tərkibli məhsullar faydalıdır. Məsələn, yumurta tərkibindəki B1, B2, B6 və B12 vitaminləri sayəsində enerji verir və məşq performansını yüksəldə bilər.
Quru meyvələrə üstünlük verin
Zülal, sağlam yağlar, lif və karbohidratlarla zəngin olan qoz, badam kimi quru meyvələr enerji verir və toxluq hissi yaradır. Xüsusilə məşqdən əvvəl fıstıq əzməsi uzunmüddətli enerji üçün ideal seçimdir.
Rasionunuza meyvə əlavə edin
Meyvələr təkcə enerji mənbəyi deyil, həm də minerallarla zəngindir. Məşqdən əvvəl lifli meyvə yemək qan şəkərinin sabit qalmasına kömək edir. Eyni zamanda, məşqdən sonra əzələ ağrılarının azalmasına da təsir edə bilər.
Karbohidratlar əzələləri qoruyur
Taxıl və paxlalı bitkilər kimi sağlam karbohidrat mənbələri məşq zamanı enerji verir və əzələ kütləsinin qorunmasına kömək edir.
İdmanla məşğul olanlara qidalanma tövsiyələri
Günə yaşıl tərəvəzlər, sağlam karbohidrat və proteinlə zəngin balanslı səhər yeməyi ilə başlayın.
Gün ərzində kifayət qədər su için. İdmançılar üçün gündəlik su tələbatı 2–4 litrdən daha çox ola bilər.
Həm məşqdən əvvəl, həm də sonra kifayət qədər protein (ət, süd məhsulları) qəbul edin.
Qeyd: Düzgün və balanslı qidalanma ilə məşq performansınızı artırmaq, əzələ və ümumi bədən sağlamlığınızı qorumaq mümkündür.
Əminə Bayramova
