ABŞ prezidenti Donald Tramp Rusiya prezidenti Vladimir Putinə Ukraynada atəşkəs üçün verdiyi müddəti “10-12 günə” azaldıb. Tramp öz təhdidini həyata keçirərsə, bəzi ölkələr çətin seçim qarşısında qalacaq. Bu vəziyyət Türkiyəyə necə təsir edəcək?
İki həftə əvvəl prezident Tramp Kreml 50 gün ərzində atəşkəs razılaşmasını imzalaya bilməsə, Rusiyaya 100% ikinci dərəcəli rüsum tətbiq edəcəyini açıqlamışdı.
İyulun 28-də Şotlandiyada çıxış edən prezident Tramp atəşkəslə bağlı irəliləyişin olmadığını nəzərə alaraq, daha gözləmək üçün “heç bir səbəb” olmadığını deyib.
Ukrayna prezidenti Vladimir Zelenski də Rusiyaya verdiyi müddətə yenidən baxdığı üçün Trampa təşəkkür edib.
İkinci dərəcəli tarif bir ölkə ilə ticarət edən digər ölkələrə tətbiq edilən vergidir.
Məsələn, Rusiyadan qaz və ya neft alan ölkə bunu davam etdirərsə, onun ABŞ-a satılan məhsullarına 100% rüsum tətbiq olunacaq.
