Yay mövsümündə havaların isinməsi bir çox insan üçün istirahət və dincəlmək fürsəti olsa da, xüsusilə şəkərli diabet (diabet) xəstələri üçün bəzi risklər meydana çıxır. Mütəxəssislər yay aylarında edilən bəzi davranışların qan şəkərində ciddi dalğalanmalara səbəb ola biləcəyini bildirirlər. Xüsusilə qidalanma, su qəbulu, dərman istifadəsi və günəşə çıxma kimi gündəlik vərdişlər diqqət tələb edir.
Yenisabah.az xəbər verir ki, mütəxəssislər yayda şəkər xəstələrinin tez-tez etdiyi və sağlamlıqlarını təhlükəyə atan 6 səhv barədə xəbərdarlıq ediblər.
Qumda ayaqyalın gəzmək: Diabet xəstələrində sinir uclarının zədələnməsi (diabetik nevropatiya) səbəbilə ayaq altındakı hissiyat azala bilər. Bu səbəblə sahildə gəzərkən ayaqlarda yaranan zədə və kəsiklər hiss olunmaya bilər, bu isə infeksiyaya və daha ciddi fəsadlara səbəb ola bilər. Sezar pizza
Qəfil və nəzarətsiz pəhriz dəyişikliyi: Yay aylarında insanlar istiyə görə daha az yeməyə və ya bəzi qidaları tamamilə kəsməyə meylli olurlar. Bu, şəkər səviyyəsinin gözlənilmədən enməsinə və ya yüksəlməsinə səbəb ola bilər. Mütəxəssislər qeyd edir ki, pəhriz dəyişikliyi həkimlə məsləhətləşilmədən edilməməlidir.
Qazlı və şəkərli içkilərə üstünlük vermək: Susuzluğu aradan qaldırmaq üçün çoxları qazlı və ya meyvə şirəsi kimi şəkər tərkibli içkilərə müraciət edir. Halbuki bu içkilər qan şəkərinin sürətlə yüksəlməsinə səbəb olur. Bunun əvəzinə su, şəkərsiz ayran və ya şəkərsiz bitki çayları tövsiyə olunur.
Dərmanların günəş altında saxlanması: İnsulin və bəzi digər dərmanlar isti havada təsirini itirə bilər. Mütəxəssislər bu dərmanların soyuducu çantada saxlanılmasının vacibliyini vurğulayır.
İdmandan imtina və ya səhv vaxtda idman: Bəzi xəstələr yayda istidən dolayı idmandan imtina edir. Digərləri isə səhvən günün ən isti saatlarında idman edir. Hər iki halda bu, qan şəkərində dalğalanmalara səbəb ola bilər. İdman daha sərin saatlara, məsələn, səhər tezdən və ya axşam saatlarına salınmalıdır.
Yayda mütəmadi şəkər ölçməmək: İsti havalarda bədən daha çox enerji sərf edir, bu isə qan şəkərinin dəyişməsinə səbəb ola bilər. Buna görə də yay aylarında da qan şəkəri nəzarəti laqeyd edilməməlidir.
Aytac Əliyeva
Telegram kanalımız
