“Rusiya prezidenti Vladimir Putin “əlavə vaxta layiq deyil”. Ona görə də fürsətdən istifadə etməyə və sanksiyalarla bağlı qanun layihəsinin işini sürətləndirməyə dəyər”.
Reyting.az xəbər verir ki, bunu amerikalı senator Riçard Blumental deyib.
“Razıyam ki, Vladimir Putin əlavə vaxta layiq deyil və sanksiyalarla bağlı qanun layihəsinə səsverməni sürətləndirmək lazımdır. Prezidentin gördüyü hər şey düzgün istiqamətdədir, lakin mən qəti şəkildə sanksiyaların 100 faiz yox, 500 faiz olmasının tərəfdarıyam”, - Blumental əlavə edib.
Eyni zamanda, Blumental iddia edir ki, Senatda qanun layihəsinin 85 tərəfdarı var, ona görə də lazım gələrsə, lazımi 90 səsi toplamaq mümkündür.
O, səsvermənin tamamilə əldə edilə bilən və zəruri məqsəd olduğunu vurğulayaraq, “andan istifadə etməyi” və Ukraynaya dəstək nümayişi təklif edir.
“Hazırda təkcə prezidentin sərəncamı ilə deyil, həm də qanunvericilik təşəbbüsü ilə hərəkət etmək, prezidentlə Konqres arasında birlik nümayiş etdirmək vaxtıdır. Biz Ukrayna qarşısında öhdəliklərimizi yerinə yetirdiyimizi göstərmək üçün bu qanuna səs verməliyik”,- senator qeyd edib.
Blumentalın sözlərinə görə, sanksiya ilə bağlı qanun layihəsi müharibəni dayandırmağa kömək edəcək və “Putin bunu başa düşməlidir”.
Bundan əvvəl ABŞ Konqresinin Nümayəndələr Palatasının spikeri Mayk Conson bildirmişdi ki, Konqres prezident Donald Trampın Kremlin rəhbəri Vladimir Putinə verdiyi 50 günlük ultimatumun müddəti bitənə qədər Rusiyaya qarşı yeni sanksiyalarla bağlı qanun layihələrini nəzərdən keçirməyəcək.
Qeyd edək ki, iyulun 29-da ABŞ prezidenti Donald Tramp Rusiya lideri Vladimir Putinə müharibədə atəşkəsə nail olmaq üçün yeni müddət təyin edib. İndi Rusiyanın bunun üçün 10 gün vaxtı var.
ELÇİN
