Rusiyanın şərqindəki Kamçatka yarımadasında 8,8 bal gücündə zəlzələ baş verib. Zəlzələdən sonra Rusiya, Yaponiya, ABŞ və Sakit okean adaları üçün sunami xəbərdarlığı edilib. İlk sunami dalğaları Kamçatka və Yaponiya sahillərinə çatdı. Fukusima Atom Elektrik Stansiyasının işçiləri təxliyə edilib. Təcili evakuasiya çağırışları ABŞ-da, xüsusən də Havay sahilləri üçün verilib. Rusiya Sunami səbəbindən Severo-Kurilsk şəhərinin bir hissəsinin su altında qaldığını açıqlayıb.
ABŞ Geoloji Xidməti (USGS) zəlzələnin episentrinin yarımadanın Petropavlovsk-Kamçatski şəhərindən 119 kilometr cənub-şərqdə olduğunu açıqlayıb.
Açıqlamada zəlzələnin 20 kilometr dərinlikdə baş verdiyi və maqnitudasının 8,8 olduğu bildirilib.
6,9 və 6,3 bal gücündə təkrar təkanların da qeydə alındığı zəlzələdən sonra Rusiya, Yaponiya, Meksika, ABŞ-ın Alyaska və Havay ştatları və Sakit okean adaları üçün sunami xəbərdarlığı edilib.
Dalğa uzunluğunun 3-4 metrə çata biləcəyi bildirilib. 8,8 bal gücündə zəlzələnin görüntüləri də ortaya çıxıb.
Zəlzələ zonasında fövqəladə vəziyyət elan edilib
Rusiyanın Saxalin vilayəti qubernatorluğu zəlzələ və sunaminin yaşandığı Kamçatkanın Severo-Kurilsk şəhərində fövqəladə vəziyyət elan edildiyini açıqlayıb.
Rusiya: Severo-Kurilsk şəhərinin bir hissəsini su basıb
Rusiya təxminən 2400 əhalisi olan Severo-Kurilsk şəhərinin bir hissəsinin sunami səbəbindən su altında qaldığını açıqlayıb.
Rusiya Elmlər Akademiyası Geofizika Xidmətinin Kamçatka şöbəsi sosial media hesabında Moskva vaxtı ilə saat 3 radələrində baş verən zəlzələnin 1952-ci ildən bəri bölgədə baş vermiş ən güclü zəlzələ olduğunu açıqlayıb.
