İnsan bədəninin bir çox bölgəsində — həzm sistemi, dəri, ağız, burun və uro-genital bölgələrdə müxtəlif bakteriyalar yaşayır. Bu bakteriyaların bəziləri probiyotik adlanır və bağırsaq sağlamlığını yaxşılaşdırmaqla yanaşı, yüksək xolesterin səviyyəsini azaltmaqda da faydalı təsirlər göstərir.
Pravda.az bildirir ki, bəzi probiyotik bakteriyalar — xüsusilə Lactobacillus və Bifidobacterium növləri — qan zərdabında LDL (pis xolesterin) və trigliserid səviyyələrini aşağı sala bilir. Bu təsir, bakteriyaların xolesterolu hüceyrə divarına bağlaması və ya onun bağırsaqlardan sorulmasının qarşısını alması ilə baş verir.
Xolesterin səviyyəsinin yüksək olması koronar ürək xəstəlikləri üçün əsas risk faktorudur. Son illərdə isə bu problemi idarə etmək üçün pəhriz və dərmanla yanaşı, probiyotik istifadəsi də ön plana çıxır.
Mütəxəssislər, probiyotiklərin müntəzəm və doza uyğun qəbul edilməsinin xolesterin səviyyəsini daha effektiv şəkildə aşağı sala biləcəyini vurğulayır.
Qeyd: Probiyotiklər dərman deyil, qida əlavəsidir. İstifadə etməzdən əvvəl həkimlə məsləhətləşmək tövsiyə olunur.
Əminə Bayramova
