Son vaxtlar sosial şəbəkələrdə pişik tükünün insan üçün ölümcül ola biləcəyi ilə bağlı yayılan iddialar müzakirələrə səbəb olub. Bəs bu nə dərəcədə doğrudur?
Yenisabah.az məsələni araşdırıb.
Mütəxəssislər bildirir ki, pişik tükü birbaşa insanı öldürə bilməz, lakin bəzi hallarda sağlamlıq üçün təhlükə yarada bilər. Dominos pizza
Əslində pişik tükünün özü zəhərli deyil və normal sağlam insan üçün təhlükə yaratmır. Lakin bəzi insanlarda pişik tükündəki "Fel d 1" adlı allergen maddə ciddi allergik reaksiyalara səbəb ola bilər. Belə reaksiyalar burun axması, öskürək, göz yaşarması, nəfəs darlığı ilə müşayiət oluna bilər. Xüsusilə astma xəstələri üçün bu allergenlər təhlükəli ola bilər və tutmaları şiddətləndirə bilər.
Mütəxəssislər qeyd edir ki, pişik tükü nəfəs yollarına və ya ağciyərlərə keçərək birbaşa zərər verməsi çox nadir rastlanan haldır. Adətən orqanizm reflekslə bu hissəcikləri xaric edir. Lakin xroniki tənəffüs problemi və ya zəif immun sistemi olan şəxslər üçün bu, infeksiyaya və bəzi hallarda ağırlaşmalara yol aça bilər.
Bundan başqa, pişiklər vasitəsilə yayılan və daha çox onların nəcisindən keçən toksoplazmoz infeksiyası da təhlükə yarada bilər. Bu infeksiyaya pişik tükü vasitəsilə yoluxma ehtimalı çox azdır, lakin xüsusilə hamilə qadınlar üçün ehtiyatlı olmaq tövsiyə olunur.
Nəticə olaraq, pişik tükü sağlam insan üçün öldürücü deyil. Lakin allergiyası, astması və ya immun sistemi zəif olan şəxslər diqqətli olmalıdır. Belə hallarda həkimə müraciət etmək və lazım gəldikdə allergiya testləri vermək tövsiyə olunur.
Aytac Əliyeva
Telegram kanalımız
