Avrokuboklarda Azərbaycan klublarının uğurlu çıxışları sayəsində ölkə UEFA reytinqində Rusiyanı qabaqlayaraq 28-ci sırada möhkəmlənib.
90deqiqe.Az-ın məlumatına görə, II təsnifat mərhələsinin cavab oyunlarının nəticəsində Azərbaycan əmsalı 18.750-ə yüksəlib. Cari mövsümdə ölkənin qazandığı əmsal isə 1.625 təşkil edib. Bu nəticə ilə Azərbaycan, 19.225 xal toplayan Ukraynanın 27-ci yerini, 18.299 xalla 29-cu sırada olan Rusiyanı geridə qoyub.
Bu həftə Azərbaycan təmsilçilərindən "Qarabağ" Çempionlar Liqasının II təsnifat mərhələsində Bakıdakı cavab oyununda İrlandiyanın "Şelburn" klubunu 1:0 hesabı ilə məğlub edib. Səfərdə rəqibini 3:0 hesabı ilə yenən "köhlən atlar" növbəti raundda Şimali Makedoniya təmsilçisi "Şkendiya" ilə qarşılaşacaq.
"Sabah" isə UEFA Konfrans Liqasının II təsnifat mərhələsində Moldovanın "Petrokub" komandasını səliqəli çıxışı ilə üstələyib. Səfərdə 2:0, evdə isə 4:1 hesabı ilə qalib gələn "bayquşlar" III təsnifat mərhələsinə yüksəlib.
"Araz-Naxçıvan" Yunanıstanda "Aris" ilə 2:2 hesablı bərabərlik əldə edərək növbəti raunda vəsiqə qazanıb. Bakıda 2:1 hesabı ilə qalib gələn Naxçıvan təmsilçisi mərhələni adlayıb.
Təəssüf ki, "Zirə" Xorvatiyada "Hayduk" qarşısında əlavə vaxtda 1:2 hesabı ilə məğlub olaraq avrokuboklardakı mübarizəni dayandırıb. Bakıda rəqibi ilə 1:1 hesablı bərabərlik əldə edən "qartallar" bu mərhələyə çıxmağa müvəffəq ola bilməyib.
Qeyd edək ki, "Sabah" UEFA Konfrans Liqasının III təsnifat mərhələsində Bolqarıstanın "Levski" (Sofiya) komandası ilə qarşılaşacaq, "Araz-Naxçıvan" isə Kiprin "Omoniya" klubu ilə münasibətlərini aydınlaşdıracaq.
