Finlandiyanın paytaxtı Helsinkidə son 12 ayda ölümlə nəticələnən yol qəzası baş verməyib. Şəhər hakimiyyəti və polisin məlumatına görə, yol qəzasında son ölüm halı 2024-cü ilin iyulunda baş verib.
Bu vəziyyət müstəsna hesab olunur və onun uğuru bir neçə amillə əlaqələndirilir.
SİA-nın məlumatına görə, bu barədə yle.fi yazır.
Əsas amillərdən biri də sürət həddinin azaldılmasıdır. 50 il əvvəl 50 km/saat olduğu halda, hazırda şəhərin küçələrinin yarıdan çoxunda sürət həddi 30 km/saatdır. Uşaqların təhlükəsizliyinə xüsusi diqqət yetirilir: yeni dərs ilinin əvvəlində məktəblərin yaxınlığında sürət də 30 km/saata endiriləcək.
Şəhərdə piyada və velosiped infrastrukturu əhəmiyyətli dərəcədə yaxşılaşdırılıb, kəsişmələr və piyada keçidləri daha təhlükəsiz edilib.
Avtomat kameralar və digər nəzarət vasitələrindən fəal istifadə olunur, yol polisi ilə əməkdaşlıq gücləndirilib. Yaxşı inkişaf etmiş ictimai nəqliyyat sistemi avtomobillərə olan ehtiyacı azaldır ki, bu da qəzaların sayının azalmasına təsir göstərir.
Bundan əlavə, müasir texnologiya nəqliyyat vasitələrini daha təhlükəsiz edib. Bu, ən həssas yol istifadəçilərini – uşaqları, gəncləri, piyadaları və velosipedçiləri qorumaq məqsədi daşıyan 2022–2026-cı illər üçün uzunmüddətli yol təhlükəsizliyi strategiyasının bir hissəsidir.
Müvafiq məlumatların toplanmasına və təhlilinə çox diqqət yetirilir. 1980-ci illərin sonu ilə müqayisədə, Helsinkidə hər il 1000-ə yaxın yaralanma və 30-a qədər ölüm hadisəsi baş verdiyi zaman, ötən il cəmi 277 belə qəza baş verib.
Şəhər mühəndisi Roni Utriainenin sözlərinə görə, uğur bütün hərəkət iştirakçılarının birgə səyləri sayəsində mümkün olub. Həmçinin qeyd edilir ki, elektrik skuterləri yeni çağırışa çevrilib, lakin son beş ildə onlar üçün də müvafiq həllər hazırlanıb.
Helsinki Avropa İttifaqının Vision Zero strategiyasına sadiqdir – 2050-ci ilə qədər yollarda ölüm hallarının sıfır səviyyəsinə nail olmaq. Şəhər hesab edir ki, bu məqsəd nəqliyyat və təhlükəsizlik sahəsində qəbul edilən bütün qərarlara təsir göstərməlidir.
Əli Babayev
