Taylandda baş verən faciəvi hadisə sosial xidmətlərin hərəkətə keçməsinə səbəb olub. Yalnız itlərlə ünsiyyət qura bilən 8 yaşlı uşaq illərdir baxımsız qaldığı evdən xilas edilib. Anası və böyük qardaşı ilə yaşayan uşaq illər boyu insan təması olmadan böyüyüb. Heç vaxt danışmağı öyrənməyib, məktəbə göndərilməyib, həmyaşıdlarından uzaqlaşdırılıb. Xilas ediləndə o, ancaq hürməklə ünsiyyət qura bildi. İndi o, dövlət himayəsinə götürülüb və həyatda ilk real addımlarını atmağa hazırlaşır.
Sfera.az bildirir ki, Taylandın Uttaradit bölgəsindəki evdə 8 yaşlı uşaq 6 itlə yaşayıb.
Anası və böyük qardaşı da evdə yaşayıb, lakin hər ikisi narkotika aludəçisi olduğundan ona tamamilə etinasız yanaşıblar. Xarici aləmdən təcrid olunub, heç bir dostu olmayıb və məktəbə getməyib. Ailənin narkotik maddə qəbul etdiyi üçün qonşular öz uşaqlarını evdən uzaqlaşdırıblar.
Uşaq yalnız itlərlə vaxt keçirib və nəticədə o, danışmaq əvəzinə hürməyi öyrənib. Polis və uşaq müdafiəsi qrupları evə daxil olanda oğlanın danışa bilmədiyini və sosial inkişafının xeyli ləngidiyini aşkar ediblər.
Anası hökumətin verdiyi pulu götürüb evdə saxlayıb.
Hökumətin təhsil yardımı da reallaşa bilməyib. Aylıq 400 baht (təxminən 12 dollar) müavinət verilməsinə baxmayaraq, oğlan məktəbə göndərilməyib. Yardım pulunu götürərkən uşağı evdə saxlamağa davam edən ana, arabir kənd-kənd gəzərək dilənçilik edib, oğlunu itlərlə tək qoyub. Evdəki gigiyena şəraiti də son dərəcə pis olub.
Bu səhlənkarlığı üzə çıxaran və dərhal müdaxilə edən məktəb rəhbərliyi sayəsində səlahiyyətlilər hadisədən xəbərdar edilib. İyunun 30-da aparılan xilasetmə əməliyyatından sonra uşaq təhlükəsiz uşaq evinə aparılıb.
Uşaq evdən çıxarılanda heç kimlə ünsiyyət qura bilməyib. O, ancaq it səslərini və hürməsini təqlid edə bilir. Onun sosial inkişafı yaşına görə əhəmiyyətli dərəcədə ləngiyir.
Hazırda fond və sosial xidmət qrupları uşağın reabilitasiyası üzərində işləyirlər. Psixoloji dəstək və əsas təhsil proqramları uşağa insanlarla ünsiyyət qurmağı öyrənməyə və onu sosial həyata yenidən inteqrasiya etməyə kömək etmək məqsədi daşıyır.
Aynil
