Onkoloq mütəxəssislər, 3 həftədən çox davam edən boğaz ağrısının sadə infeksiya deyil, baş və boyun xərçəngi əlaməti ola biləcəyini bildirir. Dr. Jiri Kubes, xüsusilə tək tərəfli boğaz və ya qulaq ağrısının infeksiya əlaməti olmadan müşahidə olunmasının diqqətdən qaçırılmamalı olduğunu vurğulayıb.
News24.az xəbər verir ki, İngiltərədə baş və boyun xərçəngi hər il təxminən 13 min yeni hal ilə ən çox yayılan 8-ci xərçəng növü sayılır. Bu xəstəlik səbəbilə hər il 4 mindən çox insan həyatını itirir. Dr. Kubes, bu xərçəng növlərinin simptomlarının zəif olduğu üçün tez-tez fərqli narahatlıqlarla səhv salındığını və erkən diaqnozun həyati əhəmiyyət daşıdığını qeyd edib.
Aşağıdakı əlamətlərə diqqət edin:
3 həftədən çox davam edən boğaz ağrısı
İnfeksiya olmadan qulaq ağrısı
Səslə bağlı dəyişikliklər (səs batması və s.)
Udqunma çətinliyi
Boyunda hiss edilən şişkinlik
Səbəbsiz arıqlama
Mütəxəssislər siqaret və spirtli içki istifadə edənlərin risk altında olduğunu, lakin heç bir risk faktoru olmayan şəxslərdə də bu xərçəng növünün görülə biləcəyini bildirirlər. Xüsusilə HPV virusu ilə əlaqəli halların gənclərdə artdığı da vurğulanıb.
Xeyrənsə Piriyeva
