Kremlin sözçüsü Dmitri Peskov prezident Vladimir Putinin Ukrayna lideri Vladimir Zelenski ilə görüşməyə hazır olduğunu bildirib.
Ukrayna-Rusiya müharibəsinin davam etdiyi bir vaxtda Moskva sülhün mümkünlüyü ilə bağlı əhəmiyyətli açıqlama verib. Kremlin sözçüsü Dmitri Peskov bildirib ki, Rusiya prezidenti Vladimir Putin uyğun şərtlər yaranarsa, Ukrayna prezidenti Vladimir Zelenski ilə görüşməyə hazırdır.
Jurnalistlərə açıqlama verən Kremlin sözçüsü Peskov Rusiyanın dialoqa qapalı olmadığını vurğulayıb. “Prezidentimiz qarşı tərəf də konstruktiv münasibət nümayiş etdirərsə, cənab Zelenski ilə görüşməyə hazırdır”, - Peskov bildirib.
Bununla belə, Peskov onu da vurğulayıb ki, görüşün baş tutması üçün Ukrayna ilk növbədə daha real mövqe tutmalıdır. Kremlin fikrincə, Kiyevin tələbləri indiki şəraitdə sülh danışıqları üçün uyğun deyil.
Ukrayna tərəfi isə indiyədək belə danışıqlara açıq olmadığını bəyan edib. Tərəflərin mövqeləri arasında ciddi fərqlərin olmasına baxmayaraq, bu bəyanat diplomatiyaya qapı aça biləcək yeni prosesin əlaməti kimi şərh edilib.
