Ajans.az xəbər verir ki,paketə məhdudlaşdırılmış 96 milyon səhm daxildir və Mask hər səhm üçün 23,34 dollar ödəməlidir. Bu qiymət 2018-ci ildə təsdiqlənmiş təzminat paketində müəyyən edilən icra qiymətinə uyğundur. Yeni səhmlərin verilməsi, Delaver ştatı məhkəməsinin yanvar ayında Maskın milyardlarla dollarlıq təzminat paketini ləğv etməsindən altı ay sonra baş verir. Məhkəmə Maskın qeyri-müstəqil direktorlarla danışıqlar apararaq bu paketi razılaşdırdığını müəyyən etmişdi. Tesla-nın Direktorlar Şurası bildirir ki, 2024-cü ilin iyununda səhmdarların planı ikinci dəfə təsdiqləməsi ilə bütün hüquqi çatışmazlıqlar aradan qaldırılıb. Şirkət əlavə edib ki, Musk Tesla-nın bazar dəyərini əhəmiyyətli dərəcədə artırdığı üçün bu mükafata layiq görülüb. Sözügedən təzminat paketinin maksimum dəyəri 56 milyard dollar təşkil edə bilər, lakin bu məbləğ şirkətin səhmlərinin bazar qiymətindən asılı olaraq dəyişir. İnteraktiv investor şirkətinin bazar rəhbəri Riçard Hunter məsələ ilə bağlı bildirib ki, bu mükafatın şirkətə uzunmüddətli fayda verib-verməyəcəyini yalnız zaman göstərəcək. O qeyd edib ki, Musk Tesla-nın əsas hərəkətverici qüvvəsi kimi tanınır, lakin son zamanlar onun siyasi fəaliyyətləri və satışlarda azalma şirkətin səhmlərinə mənfi təsir göstərib. Hazırda Tesla səhmləri bu il ərzində 19% ucuzlaşsa da, son 12 ayda 54% artım müşahidə olunub.
