Rusiya prezidenti Vladimir Putinin gizli qızı olduğu iddia edilən Yelizaveta Krivonoqix uzun illərdən sonra ilk dəfə sosial şəbəkədə susqunluğunu pozub.
Publika.az “Hürriyət”-ə istinadla xəbər verir ki, Luiza Rozova adı ilə də tanınan 22 yaşlı Krivonoqix “Telegram”da paylaşdığı mesajlarda “milyonların həyatını alan və həyatımı məhv edən adam” ifadəsini işlədib.
İddialara görə, bu sözlər onun bioloji atası sayılan Putinə ünvanlanıb. Parisdə yaşayan və incəsənət təhsili alan Krivonoqix bir vaxtlar DJ kimi çalışıb və sosial mediada aktiv paylaşımlar edib. Lakin Rusiya-Ukrayna müharibəsindən sonra onun sosial media hesabları müəammalı şəkildə silinib. Son aylarda isə o, yenidən aktivləşərək müharibə əleyhinə mesajlar paylaşmağa başlayıb.
Bildirilib ki, 2003-cü ildə Sankt-Peterburqda anadan olan Krivonoqixin anası keçmişdə Putinin evində çalışan təmizlikçi Svetlana Krivonoqixdir. İddialara görə, Krivonoqix doğulduqdan sonra qadının susması üçün ona külli miqdarda pul ödənilib. Doğum şəhadətnaməsində də ata adının “Vladimirovna” kimi qeyd olunması Krivonoqixin Putinlə bağını gücləndirən əsas detallardan sayılır.
Hazırda Fransada yaşayan gənc qadın Parisdəki qalereyalarda müharibə əleyhinə sərgilər təşkil edir. Yerli media onun kurator kimi fəaliyyət göstərdiyini bildirir. Lakin o, Putinin uşaqlıq dostu, mərhum Oleq Rudnovun soyadını götürərək “Yelizaveta Rudnova” adı ilə kimliyini gizlətməyə çalışıb.
