"Bəzi məlumatları yalnız barda, çarpayıda və ya içki süfrəsində öyrənmək olur..."
Ukrayna Müdafiə Nazirliyi Baş Kəşfiyyat İdarəsinin (BKİ) rəhbəri Kirill Budanov Ukrayna kəşfiyyatının cəsusluqda istifadə etdiyi qeyri-adi metodlardan danışaraq, qadın eskort və seks xidmətləri ilə məşğul olanların mühüm informasiya mənbəyinə çevrildiyini etiraf edib.
Moderator.az xəbər verir ki, bu barədə o, ukraynalı jurnalist və videobloger Ramina Eshakzaya verdiyi müsahibəsində danışıb. Məlumatı "focus.ua" nəşri yayıb.
Budanovun sözlərinə görə, bəzi hallarda kişi hədəflər bu qadınlara özlərini "güclü və vacib" göstərmək üçün dövlət sirrlərinə qədər danışırlar: "İnanılmazdır, amma belə olub - bir neçə unikal məlumat elə bu yolla əldə edilib. Heç bir klassik üsulla onları öyrənmək mümkün olmazdı".
Qadınların artan rolu və psixoloji üstünlük
Budanov bildirib ki, Ukrayna kəşfiyyatında - həm operativ bölmələrdə, həm də döyüş sahəsində qadınların sayı durmadan artır. Hazırda BKİ-də təxminən 1500 qadın xidmət edir. O, 2020-ci ildən bəri Akademiyada qəbul imtahanlarının qaliblərinin də əsasən qadınlar olduğunu vurğulayıb. Bu isə onların həm intellektual, həm də psixoloji baxımdan müstəsna bacarıqlarını göstərir.
Baş kəşfiyyatçı qeyd edib ki, kişilərin "rahat və qorumasız" vəziyyətlərdə olduqları anlar, məsələn, spirtli içki içərkən və ya intim münasibət zamanı onların ən çox informasiya verdikləri hallardır. "İnsan zəifliklərindən istifadə - bu bizim peşəmizin əsas alətlərindən biridir", - o, bildirib.
Gizli həyat: agentlər, əfsanələr və sükut
Budanov onu da təsdiqləyib ki, Ukrayna kəşfiyyatında "nəzarətdən kənar", yəni "nəzarətə götürülmədən" xarici ölkələrdə, bəzən saxta ad altında yaşayan agentlər var. Bəziləri hazırda Rusiyada yaşayıb, Putinə sadiq görünərək Ukrayna üçün kəşfiyyat işi aparır. Bu agentlər illərlə saxta həyat sürür, ailələri isə onların gerçək kimliyindən xəbərsiz olur.
Budanovun sözlərinə görə, kəşfiyyatın uğuru yalnız texniki imkanlarla deyil, həm də insan psixologiyasını düzgün oxumaqla mümkündür: "Əgər bir kişi özünü önəmli göstərmək üçün barda tanımadığı qadına hərbi sirr verirsə, deməli, bu onun seçimi deyil, zəifliyidir. Biz bu zəifliyi sistemli şəkildə analiz edib informasiyaya çeviririk".
Kəşfiyyatçının peşəsi səhnədəki aktyor kimidir
BKİ rəhbəri əlavə edib ki, çox zaman agentlər fərqli peşələr altında fəaliyyət göstərir. Ən geniş yayılmış maskalar sırasında jurnalistlər, sahibkarlar və sosioloqlar var. Əsas məsələ - inandırıcı "əfsanə" yaratmaqdır. "Bəzən onlar tanınmış simalar, bəzən isə çox sadə və görünməyən adamlar olur. Amma hamısı bir rolu mükəmməl şəkildə oynayır", - o, vurğulayıb.
Ukrayna kəşfiyyatının bu açıq etirafı həm taktiki çevikliyin, həm də hədəfə doğru istənilən yolla getməyin nümunəsi sayıla bilər. Və bəlkə də müasir müharibənin gerçək cəbhəsi artıq səngərlərdə yox, gecə klubunda, restoran masasında və ya tək bir baxışın içində gizlənir.
