Finss.az - Almaniya şirkətləri ABŞ ilə gömrük razılaşmasından narahatdır.
Avropa İttifaqı ilə ABŞ arasında əldə olunan gömrük razılaşması Almaniyada fəaliyyət göstərən şirkətlər üçün əlavə iqtisadi narahatlıqlara səbəb olub. Almaniya Sənaye və Ticarət Palatası (DIHK) tərəfindən keçirilən sorğuda iştirak edən 3355 şirkətin 58 faizi bu razılaşmanın əlavə yük yaradacağını bildirib. Xüsusilə ABŞ ilə birbaşa ticarət əlaqəsi olan şirkətlər arasında bu rəqəm 74%-ə çatıb.
DIHK baş direktoru Helena Melnikov razılaşmanın siyasi baxımdan zəruri olduğunu vurğulasa da, alman şirkətlərinin bu yeni vergi artımı və bürokratiya yükündən ciddi narahatlıq keçirdiyini qeyd edib. Razılaşmaya əsasən, ABŞ-a Avropa İttifaqından idxal edilən məhsullara 15 faiz gömrük rüsumu tətbiq olunacaq ki, bu da rəqabət qabiliyyətini zəiflədə bilər.
ABŞ ticarət siyasətinin yaratdığı qeyri-müəyyənliklər nəticəsində alman şirkətlərinin 89 faizi artıq mənfi təsirləri hiss etdiyini bildirib. ABŞ bazarına yatırımlarını azaltmaq və ya dondurmaq niyyətində olanların payı 54%-dir.
Eyni zamanda, Almaniya şirkətləri İsveçrəyə tətbiq edilən 39 faiz gömrük tariflərindən müəyyən üstünlük əldə edə bilərlər. Lakin İsveçrənin iqtisadi zəifləməsi Almaniyanın əsas ticarət tərəfdaşlarından biri kimi risklər yaradır.
