Gürcüstanın keçmiş prezidenti Mixail Saakaşvilinin administrasiyası 2008-ci ilin avqustunda hərbi əməliyyatlara başlamaqla respublikanın milli maraqlarına külli miqdarda ziyan vurub.
HİT.az xəbər verir ki, bunu ölkənin baş naziri İrakli Kobaxidze deyib.
Hökumət başçısı o vaxt hakimiyyət tərəfindən imzalanmış bütün sənədləri geri çağırmağı təklif edib:
"Bu sənədlərdən qaçmaq mümkün deyil, onlar o vaxtkı hökumətin Cənubi Osetiyada müharibəyə başlamasının və ölkəmizin milli maraqlarına ağır zərbə vurmasının təkzibedilməz sübutudur. Bu, vətənə xəyanətdir", deyə Kobaxidze bildirib.
O qeyd edib ki, Avropa Şurasının qətnaməsi və münaqişəni araşdıran beynəlxalq komissiyanın o vaxtkı rəhbəri Haydi Taqliavininin rəyi sübut edir ki, 2008-ci il avqustun 7-də Sxinvaliyə artilleriya atəşi açan gürcü əsgərləri olub. Bundan sonra hakimiyyət hərbçilərin getdikcə daha çox yaşayış məntəqəsini nəzarətə götürərək Sxinvaliyə doğru irəlilədiyini “qürurla elan etdi”.
Baş nazir Saakaşvili administrasiyasının hərəkətləri nəticəsində yüzlərlə insanın zərər çəkdiyinə diqqət çəkib. Onlardan 400-dən çoxu sağ qalmayıb.
Samir
