ABŞ və Çinin tarifləri (gömrük rüsumlarını və ya vergilərini) artırmaq planlarını təxirə salmaları ilə əlaqədar olaraq neft bahalaşıb.
Marja xəbər verir ki, bu qərarlar, iki ölkə arasında ticarət müharibəsinin artacağı, onların iqtisadiyyatlarına mənfi təsir göstərəcəyi və dünyanın iki ən böyük neft istehlakçısında yanacağa tələbatın azalacağı ilə bağlı narahatlıqları azaldıb.
Brent markalı neftin fyuçersləri 0,39 faiz bahalaşaraq barreli 66,89 dollara, ABŞ xam nefti (WTI) isə 0,34 faiz bahalaşaraq 64,18 dollara çatıb.
Ağ Ev rəsmisi bazar ertəsi bildirib ki, ABŞ prezidenti Donald Tramp Çinə tətbiq edilən yüksək tariflər üzrə "atəşkəs" müddətini daha 90 gün uzadıb. ABŞ pərakəndə satış şirkətləri ilsonu tətil mövsümünə hazırlaşarkən, bu addım ABŞ-a idxal olunan Çin mallarına üçrəqəmli vergilərin tətbiq edilməsinin qarşısını alır.
Bu xəbər, dünyanın iki ən böyük iqtisadiyyatı arasında razılaşma əldə olunacağına və potensial ticarət embarqosunun qarşısının alınacağına dair ümidləri artırıb. Yüksək tariflər iqtisadi artımı yavaşlada, yanacağa tələbi zəiflədə və nəticədə neftin qiymətini aşağı sala bilər.
Həmçinin investorlar Tramp və Rusiya prezidenti Vladimir Putin arasında avqustun 15-də Alyaskada Ukraynada müharibəyə son qoyulmasını müzakirə etmək üçün gözlənilən görüşə diqqət yetirirlər.
Görüş ABŞ-ın Rusiyaya artan təzyiqləri fonunda keçirilir və sülh razılaşması əldə olunmazsa, Çin və Hindistan kimi Rusiya neftinin alıcılarına qarşı daha sərt sanksiyaların tətbiq oluna biləcəyi ilə bağlı xəbərdarlıq edilir.
