Bakı, 12 avqust, AZƏRTAC
Livanın paytaxtı Beyrut şəhərində Livan-Azərbaycan Dostluq Assosiasiyası yaradılıb, tərkibi təsdiq olunub.
Diasporla İş üzrə Dövlət Komitəsindən AZƏRTAC-a bildirilib ki, Assosiasiyanın yaradılması vaxtilə Azərbaycanın müxtəlif universitetlərində ali təhsil almış livanlı məzunların, xüsusilə mühəndis Əkrəm Tarhininin təşəbbüsü ilə həyata keçirilib. Məqsəd hər iki ölkənin xalqları arasında əlaqələri daha da möhkəmləndirmək, elm, mədəniyyət, təhsil, turizm, səhiyyə, sosial və digər sahələrdə əməkdaşlığı genişləndirməkdir.
Qeyd edək ki, assosiasiyanın prezidenti Əkrəm Tarhini Livanın İnkişaf və Bərpa Şurasının layihə rəhbəridir. O, 1991-ci ildə Azərbaycan Dövlət Neft və Sənaye Universitetində, daha sonra isə Azərbaycan Memarlıq və İnşaat Universitetində təhsil alıb. Ölkəmizdə keçirilən bir sıra dövlət və beynəlxalq əhəmiyyətli tədbirlərdə qonaq qismində iştirak edib. Bir müddət əvvəl isə o, Livanın Kavaşra kəndində keçirilən Azərbaycan Evinin açılış mərasiminə qatılıb. Bu tədbir iki ölkə arasındakı münasibətlərin inkişafına xidmət etməklə yanaşı, burada yaşayan türkmən icması üçün də mühüm hadisə sayılır.
