İsrail ordusunun mexanikləşdirilmiş bölmələri Suriyanın Əl-Kuneytra əyalətinin ərazisinə daxil olaraq 5 yaşayış məntəqəsində "təmizlik işləri" həyata keçirib.
“Report” xəbər verir ki, bu barədə “Al-Ixhbariya” telekanalı məlumat yayıb.
Şimal bölgəsində işğalçı qüvvələr Tərancda avqustun 12-də xüsusi əməliyyat keçiriblər. Oradan patrullardan biri Xodr şəhərinə doğru hərəkətini davam etdirib.
Əyalətin cənub hissəsində müvəqqəti nəzarət-buraxılış məntəqələrinin qurulduğu Tell-Əhmar təpəsi və Əl-Əsbah kəndi yaxınlığında İsrail hərbçiləri qeydə alınıb. Mərkəzi hissədə İsrail hərbçiləri Kidna kəndini işğal edərək, sakinlərin evlərini tərk etmələrini qadağan edib.
Xatırladaq ki, avqustun 10-da İsrailin 5 zirehli texnikasından ibarət kolon işğal altında olan Holan yüksəklikləri ilə sərhəddə yerləşən Ər-Rafid şəhərinə daxil olub. Digər bir kolon əyalətin mərkəzində, Dəməşqdən 70 km aralıda yerləşən Ruveyhina qəsəbəsinə doğru irəliləyib.
Bundan əvvəl iyulun 26-da Parisdə ABŞ-nin vasitəçiliyi ilə Suriya və İsrail nümayəndə heyətləri arasında danışıqlar aparılıb. Dəməşqdəki diplomatik mənbənin bildirdiyinə görə, tərəflər 1974-cü ildən İsrail və Suriya qüvvələrinin Holan yüksəkliklərindən çıxarılmasına dair razılaşmanın bərpasının mümkünlüyünü müzakirə ediblər. Onun sözlərinə görə, Suriya tərəfi İsrail qoşunlarının bu yaxınlarda irəlilədikləri mövqelərdən dərhal çıxarılması tələbini irəli sürüb.
