Xəzər Rayon Məhkəməsində qəsdən sağlamlığa az ağır zərər vurmada və xuliqanlıqda təqsirləndirilən Elmir Qurbanovun (soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Ramilə Xəzrinin sədrliyi ilə keçirilən prosesdə hökm oxunub.
Məhkəmənin hökmü ilə ona 2 il 11 ay 26 gün müddətə azadlığın məhdudlaşdırılması (elektron qolbaq) cəzası təyin edilib.
İttihama görə, hadisə 23 sentyabr 2024-cü il tarixdə, saat 15:40 radələrində Bakı şəhəri, Xəzər rayonu, Binə qəsəbəsi, "Mehriban Qonşular" adlı kafenin yaxınlığında qeydə alınıb.
Belə ki, Elmir Qurbanov yol vərəqəsi əsasında sürücü olaraq idarə etdiyi “Karsan” markalı 160 saylı marşrut xətt avtobusunda hərəkətdə olarkən sükan arxasında siqaret yandırıb çəkib. Həmin vaxt avtobusda sərnişin kimi əyləşmiş zərərçəkmiş Natiq Göyüşzadə (soyadı şərtidir) ona siqareti söndürməsini, əks halda ondan şikayət edəcəyini deyib, siqaretin tüstüsünü ətrafa yayıb sərnişinlərin səhhətinə pis təsir göstərməsini bildirib. Lakin təqsirləndirilən şəxs zərərçəkmişin haqlı iradına məhəl qoymayıb, Natiqlə mübahisə edib. Sonra o, avtobusu yaxınlıqdakı dayanacaqda saxlayaraq sükan arxasından qalxıb zərərçəkmiş şəxs tərəfə gələrək ona müqavimət göstərib. Elmir əvvəlcə avtobusun salonunda digər sərnişinlərin gözü qarşısında Natiqin ünvanına uca səslə təhqiramiz ifadələr işlədib, xuliqanlıq niyyəti ilə onu söyüb təhqir edib. Sonra zərərçəkmiş şəxsin baş və bədəninin müxtəlif nahiyələrindən yumruq və təpiklə bir neçə dəfə vurub. Daha sonra isə o, Natiqi avtobusdan itələyib çıxardıb, dayanacaqda yerə yıxıb, onun baş və bədəninin müxtəlif nahiyələrindən təkrarən yumruq və təpiklə bir neçə dəfə vuraraq xəsarət yetirib.
Hadisədən sonra Elmir Qurbanov saxlanılıb və barəsində polisin nəzarəti altında vermə qətimkan tədbiri seçilib.
Kamal Məmmədov
