ABŞ-ın Alyaska ştatında keçirilən Arctic Edge 2025 adlı hərbi təlimlər zamanı Rusiyaya doğru istiqamətlənmiş hava şarı (aerostat) buraxılıb. Vətəninfo.az xəbər verir ki, bu barədə RBC “Alaska Beacon” nəşrinə istinadla məlumat yayıb.
8 avqust tarixində Alyaskanın cənub-mərkəzi bölgəsinin sakinləri göydə qeyri-adi mənzərə müşahidə ediblər — ağ-gümüşü rəngli böyük hava şarı, hansı ki, naməlum avadanlıq daşıyırdı və Rusiyaya tərəf hərəkət edirdi.
Alyaska Komandanlığının və NORAD-ın (Şimali Amerika Hava Hücumundan Müdafiə Komandanlığı) Alyaska üzrə nümayəndəsi Canell Haag qeyd edib ki, bu aerostatın buraxılması Arctic Edge 2025 təlimlərinin bir hissəsidir. Təlimlər avqust ayı boyunca ABŞ-Rusiya dəniz sərhədi yaxınlığında yerləşən bölgələrdə — Nome, Kotzebue, Cold Bay və digər yerlərdə keçirilir.
Aerostat Aerostar şirkəti tərəfindən (Cənubi Dakota) istehsal olunub və yüksək hündürlükdə uzunmüddətli müşahidə üçün nəzərdə tutulub. Şirkət bildirir ki, bu cür hava şarları pilotsuz uçuş aparatlarını (dronları) geridə qoyan texniki imkanlara malikdir. Lakin belə uçuşlar yerli əhalidə vaxtaşırı narahatlıq yaradır.
Qeyd edək ki, ABŞ Prezidenti Donald Tramp 8 avqustda verdiyi açıqlamada 15 avqustda Alyaskada Rusiya Prezidenti Vladimir Putinlə görüşməyi planlaşdırdığını bəyan etmişdi. Sonradan bu məlumatı Rusiya Prezidentinin köməkçisi Yuri Uşakov da təsdiqləyib. Onun sözlərinə görə, görüşdə əsas diqqət Ukrayna münaqişəsinin uzunmüddətli sülh yolu ilə həlli yollarının müzakirəsinə yönələcək. Kreml həmçinin vurğulayıb ki, növbəti görüşün Rusiya ərazisində keçirilməsi planlaşdırılır.
