Beynəlxalq Enerji Agentliyinin (BEA və ya İEA (International Energy Agency)) hesabatında bildirilir ki, gələn il qlobal neft bazarlarında tələbin artım tempinin zəifləməsi və təklifin yüksəlməsi fonunda rekord həcmdə profisit (artıqlıq və ya neft bolluğu) yaranacaq.
Marja.az xəbər verir ki, Qurumun aylıq icmalına görə, neft ehtiyatları gündəlik 2,96 milyon barrel artacaq ki, bu göstərici hətta pandemiya ili olan 2020-ci ildəki orta artımı da geridə qoyacaq.
Hesabatda qeyd olunur: “Son məlumatlar böyük iqtisadiyyatlarda tələbin zəif olduğunu göstərir. İstehlakçı inamının hələ də aşağı səviyyədə olması kəskin bərpanı uzaq perspektivə daşıyır”.
Səudiyyə Ərəbistanının liderlik etdiyi OPEC+ koalisiyası dayandırılmış hasilatın bərpasını sürətləndirib. BEA, xüsusilə Amerika qitəsi olmaqla, 2026-cı il üçün qrupdankənar hasilat proqnozlarını bir qədər artırıb.
Bu il xam neft qiymətləri, OPEC+ ölkələrinin hasilat artırmalarının da təsiri ilə, təxminən 12% düşüb.
Baş ofisi Parisdə yerləşən BEA-nın proqnozuna əsasən, Çində, Hindistanda və Braziliyadakı zəif tələbat səbəbindən qlobal neft istehlakı bu il gündəlik 680 min barrel artacaq ki, bu da əvvəlki 700 min barrel proqnozundan aşağı və 2019-cu ildən bəri ən zəif göstəricidir.
BEA vurğulayıb ki, ölkələrin elektrikli nəqliyyat vasitələrinə keçidi ilə, onilliyin sonuna doğru qlobal neft tələbi artımının dayanacağı gözlənilir.
