Almaniya kansleri Fridrix Mers bildirib ki, Ukrayna ərazi məsələlərini müzakirə etməyə hazırdır, lakin Rusiyanın işğal etdiyi ərazilər üzərində suverenliyini tanımaq niyyətində deyil.
Mers bu fikirləri Ukrayna prezidenti Vladimir Zelenski ilə birgə keçirdiyi mətbuat konfransında səsləndirib. O, həmçinin ABŞ prezidenti Donald Tramp və digər Avropa liderləri ilə aparılan telefon danışığının məzmununu qısa şəkildə çatdırıb.
Kanslerin sözlərinə görə, Trampa ilk növbədə cəbhədə atəşkəs rejiminin qurulmalı olduğu, daha sonra isə müharibəni bitirəcək uzunmüddətli sazişin bağlanmasının mümkünlüyü izah edilib.
“Ukrayna ərazi məsələlərini müzakirəyə hazırdır, lakin başlanğıc nöqtəsi cəbhə xətti olmalıdır. Rusiya işğalının tanınması müzakirə mövzusu deyil,” — deyə Mers vurğulayıb.
//Samir Qurbanov, Editor.az
