Hindistanda 35 yaşlı kişi səkkiz ay boyunca sol gözündə qızartı və bulanıq görmə yaşayıb. Müayinə zamanı həkimlər gözün arxa hissəsində yavaş hərəkət edən kiçik bir qurd aşkar ediblər.
Sherg.az xəbər verir ki, “Pars plana vitrektomi” üsulu ilə gözün içindəki jel mayesinin bir hissəsi çıxarılaraq parazit canlı şəkildə təmizlənib. Mikroskopik araşdırma onun Gnathostoma spinigerum növünə aid olduğu müəyyən edib.
Bu parazit adətən pişik və itlərin bağırsaqlarında yaşayır, insanlara isə çiy və ya az bişmiş yoluxmuş ət vasitəsilə keçir. Yoluxma əvvəlcə həzm sistemi əlamətləri ilə başlayır, daha sonra sürfələr bədəndə gəzərək dəri, beyin və göz kimi orqanlara yerləşə bilir.
