Həm yanacağa qənaət edən, həm də ekoloji üstünlükləri ilə seçilən elektrik mühərrikli avtomobillərə ölkəmizdə tələbat əhəmiyyətli dərəcədə artıb.
Operativ Media xəbər verir ki, bu barədə AzTV-nin hazırladığı reportdajda bildirilib.
Qeyd edilir ki, 2024-cü ildə qiymətlər müəyyən qədər yüksəlsə də, 2025-ci ildə daha münasib olub. Hazırda bazarda əsasən aşağı seqmentə aid modellər üstünlük təşkil edir. Onların qiyməti 20 mindən başlayaraq 30-40 min manat aralığında dəyişir. Müxtəlif şəhərlərdə artıq minlərlə belə avtomobil istismardadır. Ümumilikdə, bazarda payın 78 faizi elektrik və hibrid avtomobillərin payına düşür.
Ölkəyə gətirilən avtomobillərin çoxu Çin istehsalıdır. Son illərdə idxal edilən modellər daha zəngin komplektasiya – monitorlar, əlavə idarəetmə düymələri və digər funksiyalarla təchiz olunur.
Mütəxəssislər bildiriblər ki, alıcılar avtomobil alarkən mütləq rəsmi dilerlərə müraciət etməlidirlər. Çünki rəsmi satış mərkəzləri zəmanət və ehtiyat hissələri ilə təminat baxımından daha etibarlıdır.
Bildirilir ki, 2019-cu ildən elektrik mühərrikli avtomobillərin idxalına başlanılıb. 2022-ci ildən isə bu nəqliyyat vasitələrinin satışı əlavə dəyər vergisindən azad edilib, idxalda tətbiq olunan 15 faiz gömrük rüsumu isə sıfıra endirilib.
Eyni zamanda güzəştlər enerji doldurucularına da şamil olunur.
Reportajda vurğulanıb ki, dövlətin yaratdığı bu imkanlar alıcılar üçün əlverişli şərait yaradır, ekoloji təmiz avtomobillərin yayılmasını sürətləndirir və bazarda tələbatın artmasına səbəb olur.
