BAKI, 14 avqust. TELEQRAF
Bu ilin ilk yarısında Fələstinin qismən nəzarətində olan İordan çayının qərb sahilində israilli radikallar rekord sayda fələstinli sakinlərə hücumlar təşkil ediblər.
Teleqraf xəbər verir ki, bu barədə BMT-nin Humanitar Məsələlər üzrə Koordinasiya Ofisinin (OCHA) verdiyi məlumatda qeyd olunub.
Bu ilin ilk yarısında İsrail radikalları fələstinlilərə və onların əmlaklarına təxminən 750 hücum həyata keçirib. Bu, BMT-nin 2006-cı ildən bəri izlədiyi statistikada ən yüksək rəqəm olaraq qeydə alınıb.
İsrail ordusunun məlumatlarına görə, 2025-ci ilin əvvəlindən indiyədək 440 hücum qeydə alınıb. 2023-cü il oktyabrın 7-də HƏMAS silahlı qruplaşmasının İsrailə hücumundan sonra, radikal israillilərin fələstinlilərə qarşı hücumları daha da artıb. Qəzza zolağındakı münaqişənin kəskinləşməsi isə İordan çayının qərb sahilindəki vəziyyəti daha da gərginləşdirib.
