ABŞ Prezidenti Donald Trump, Ukrayna ilə Rusiya arasında mümkün bir sülh razılaşması çərçivəsində Ukraynaya hərbi dəstək verəcəyini təsdiqləyib.
Vətəninfo.az xəbər verir ki, Ağ Evdə Ukrayna Prezidenti Volodimir Zelenski və bir sıra Avropa liderləri ilə birgə keçirilən görüşdə Trump, Ukraynaya “çox yaxşı qoruma və çox yaxşı təhlükəsizlik” təmin edəcəyini bildirib və ABŞ hərbçilərinin Ukrayna torpaqlarında yerləşdirilməsini istisna etməyib.
Trump, Rusiya Prezidenti Vladimir Putinin Ukraynanın təhlükəsizliyi üçün zəmanətlər verəcəyini və bunu “çox mühüm bir addım” olaraq qiymətləndirdiyini açıqlayıb.
Almaniya kansleri Fridrix Merz, Ukrayna və Rusiya liderlərinin iki həftə ərzində görüşəcəyini və bu görüşün, 2022-ci ilin fevralında Moskvanın Ukraynaya tammiqyaslı müdaxiləsindən sonra ilk dəfə olacaq üz-üzə görüş olacağını bildirib.
Trump, sülh danışıqlarını təşkil etdiyini və sonrasında Ukrayna və Rusiya prezidentləri ilə üçtərəfli bir görüşdə iştirak edəcəyini də açıqlayıb.
“Bu, demək olar ki, dörd ildir davam edən müharibə üçün çox yaxşı bir ilk addımdır,” deyə Trump vurğulayıb və əlavə edib ki, müharibənin həllinə yönələn danışıqlarda ABŞ vitse-prezidenti JD Vance, dövlət katibi Marko Rubio və prezidentin xüsusi nümayəndəsi Steve Witkoff da Rusiya və Ukraynalı liderlərlə koordinasiya aparırlar.
Əvvəlki cəhdlərin uğursuz olduğunu nəzərə alaraq, Trump sülh danışıqlarının irəliləməsi və Ukraynaya qarşı müharibənin sona çatması üçün ciddi addımlar atıldığını bildirir.
Görüşdə, Zelenski, Trump-a təcavüzkarların hədəf aldığı Ukrayna uşaqlarını xatırladan bir məktub təqdim edib. Ukraynanın birinci xanımı da uşaqların Rusiya tərəfindən qaçırılması ilə bağlı Putinə məktub göndərib.
Trump həmçinin, Avropa ölkələrinin təhlükəsizliyi və Ukraynanın gələcəkdə qorunması üçün “Maddə 5” tərzində zəmanətlər veriləcəyini qeyd edib və bununla bağlı Avropa liderləri ilə sıx əməkdaşlıq edildiyini vurğulayıb.
Həmçinin, Trump, müharibənin sona çatması üçün müvəqqəti atəşkəsin deyil, kalıcı bir sülh razılaşmasının tərəfdarı olduğunu bildirib. Lakin Fransanın Prezidenti Emmanuel Macron və Almaniya kansleri Merz, atəşkəsin sülh danışıqlarının əsasını təşkil etməli olduğunu müdafiə ediblər.
Görüşün sonunda, Zelenski və Trump, Avropa liderləri ilə “ailə foto”sunda yer alıblar, daha sonra isə Avropa liderləri ilə daha detallı sülh sazişi danışıqları aparılıb.
