Vətəninfo.az xəbər verir ki, Ukrayna prezidenti Vladimir Zelenski dünən Ağ Evdə keçirilən danışıqları Telegram-da şərh edib.
“Müharibənin dayandırılması, Ukraynanın və xalqımızın təhlükəsizliyinin təmin edilməsi istiqamətində həqiqətən mühüm addımdır. Biz artıq təhlükəsizlik zəmanətlərinin konkret məzmunu üzərində işləyirik”, – Zelenski yazıb.
O, bunun hansı məzmunda olacağı barədə ətraflı məlumat verməyib.
“Bu gün biz liderlər səviyyəsində koordinasiyanı davam etdiririk. Müzakirələr olacaq və biz müvafiq formatları hazırlayırıq. Biz işi sabah davam etdirəcəyik. Milli təhlükəsizlik müşavirləri də hazırda daimi əlaqədədir. Təhlükəsizlik təminatları olacaq”, – deyə Ukrayna prezidenti əlavə edib.
Çərşənbə axşamı, avqustun 19-da Böyük Britaniyanın baş naziri Key Starmer və Fransa prezidenti Emmanuel Makron tərəfindən “istəklilər koalisiyası”nın (Ukraynaya dəstək planı hazırlayan bir qrup ölkə) görüşlərinin, həmçinin videokonfrans formatında Avropa Şurasının iclasının keçirilməsi planlaşdırılır.
