Ukrayna Prezident Aparatının rəhbəri Andriy Yermak bildirib ki, Avropa və NATO ölkələri hərbi təhlükəsizlik təminatlarını artırmaq və gələcək hücumların qarşısını almaq üçün milli təhlükəsizlik müşavirləri ilə gündəlik koordinasiya prosesinə başlayıblar.
Yermak, ABŞ mərkəzli X şirkətinin sosial media hesabından verdiyi açıqlamada, "Vaşinqtondan qayıtdıqdan dərhal sonra Almaniya, İtaliya, Fransa, Böyük Britaniya, Finlandiya, Avropa Birliyi və NATO-nu təmsil edən milli təhlükəsizlik müşavirləri ilə kifayət qədər uzun sürən ilk koordinasiya görüşümü keçirdim" dedi.

1994-cü il Budapeşt Memorandumuna toxunaraq, Ukrayna və müttəfiqlərinin keçmiş səhvlərini təkrarlamaması lazım olduğunu vurğulayan Yermak, "Hücumların təkrarlanmaması üçün hər şey çox konkret və təsirli olmalıdır" dedi.

Yermak həmçinin bildirib ki, müttəfiqlərlə gündəlik koordinasiya yaradılması barədə razılıq əldə olunub.

Yermak, Ukrayna hərbi qruplarının təhlükəsizlik zəmanətlərinin müdafiə komponentləri üzərində işə başladığını və konkret hərbi təhlükəsizlik təminatlarının irəli sürülməsi üçün Avropa və NATO ölkələrinin milli təhlükəsizlik müşavirləri ilə koordinasiya prosesinə başladıqlarını bildirdi.

Yermak ölkəsinin müharibənin “ədalətli” sona çatması üçün bütün formatlarda danışıqlara hazır olduğunu bildirib və ABŞ Prezidenti Donald Trampa, Avropa müttəfiqlərinə və NATO-ya dəstəklərinə görə təşəkkür edib.

Tramp Putinlə görüşüb
ABŞ prezidenti Donald Tramp avqustun 15-də Alyaskada Rusiya prezidenti Vladimir Putinlə görüşüb və yekun razılaşmanın əldə olunmadığını açıqlayıb.

Tramp avqustun 18-də Ağ Evdə Zelenski və Avropa liderləri ilə görüşüb. Görüşdə NATO-nun baş katibi Mark Rutte, Aİ Komissiyasının sədri Ursula fon der Leyen, Fransa prezidenti Emmanuel Makron, Böyük Britaniyanın baş naziri Key Starmer, Finlandiya prezidenti Aleksandr Stubb, İtaliyanın baş naziri Giorgia Meloni və Almaniya kansleri Fridrix Merz iştirak edib.

Görüş zamanı ABŞ-ın iştirakı ilə NATO müqaviləsinin kollektiv təhlükəsizliyi nəzərdə tutan 5-ci maddəsinə bənzər Ukrayna üçün təhlükəsizlik təminatları müzakirə edilib.

Görüşdən sonra Tramp Avropa liderləri ilə görüşünün çox yaxşı keçdiyini və Putin və Zelenski ilə özünün də iştirak edəcəyi üçtərəfli sammitə hazırlıqlara başladığını açıqlayıb.

aia.az
Tərcümə şöbəsi

• Ukrayna
• Avropa
• Nato
• Koordinasiya