Dünyanın ən yaşlı insanı Ethel Caterham ailəsi ilə birlikdə 116-cı doğum gününü qeyd edib. Aprel ayında 116 yaşında vəfat edən braziliyalı rahibə Inah Canabarro Lucasdan sonra bu titul Caterhama keçib.
Sherg.az xəbər verir ki, Surreydəki bir qayğı evində yaşayan Caterhamın doğum günü ailəsi ilə birlikdə qeyd olunub.
Qayğı evi belə bir açıqlama yayıb: “Ethel və ailəsi bu il 116-cı doğum gününü qeyd edərkən göstərilən diqqət və xoş mesajlara görə minnətdardır.” Caterhamın müsahibə verməyəcəyi bildirilib, lakin yeganə istisnanın Kral III Charles ola biləcəyi qeyd olunub.
Caterham 1909-cu ilin 21 avqustunda, I Dünya Müharibəsindən beş il əvvəl İngiltərənin Shipton Bellinger kəndində dünyaya gəlib. Ginnesin Rekordlar Kitabına görə, tarixin ən yaşlı insanı isə 1997-ci ildə 122 il 164 günlük olarkən vəfat edən fransız Jeanne Calmentdir.
Caterham uzunömürlülüyünün sirrini belə açıqlamışdı:
“Heç kimlə əsla mübahisə etmirəm! Dinləyirəm və canım nə istəyirsə onu edirəm.”
