Ötən ay Azərbaycan orta sabit genişzolaqlı sürətə (82,58 Mbit/s) görə iyun ayı ilə müqayisədə 2 pillə irəliləyərək 153 ölkə arasında 81-ci yerdə qərarlaşıb.Azərbaycanda internetin sürətinin daha da artırılması üçün hansı addımlar atılmalıdır? Hazırda ölkəmizdəki internetin sürəti və keyfiyyətdi nə dərəcədə yetərlidir?
Mövzu ilə bağlı Azərbaycan İnformasiya və Kommunikasiya Texnologiyaları Sənayesi Assosiasiyası (AİKTSA) İdarə Heyətinin sədri Elvin Abbasov Referans-a açıqlama verib. Hazırda ölkəmizdəki internetin sürəti və keyfiyyəti nə dərəcədə yetərlidir?
İnformasiya texnologiyaları üzrə ekspert qeyd edib ki, “Ookla”nın hesabatı göstərir ki, son bir ildə Azərbaycanda sabit genişzolaqlı internet sürəti iki dəfədən çox artaraq 82,58 Mbit/s-ə çatıb. Bu, çox əhəmiyyətli göstəricidir və xüsusilə “Online Azərbaycan” layihəsi çərçivəsində ölkənin ən ucqar rayon və kəndlərinə qədər fiber-optik şəbəkənin çəkilməsi bu nailiyyətin əsas səbəblərindəndir. Bugünkü sürət gündəlik istifadəçilər üçün kifayət edir, lakin data mərkəzləri, startap ekosistemi və iri biznes üçün daha yüksək göstəricilərə ehtiyac var.
İnternetin sürətinin daha da artırılması üçün hansı addımlar atılmalıdır?
Növbəti mərhələdə fiber-optik şəbəkənin istifadəsinin genişləndirilməsi, beynəlxalq rabitə xətlərinin diversifikasiyası və Transxəzər Fiber-Optik Kabel Xətti kimi strateji layihələrin icrası həlledici olacaq. Paralel olaraq, 5G texnologiyasının tətbiqi mobil şəbəkələrdə sürəti və dayanıqlığı artıracaq. Bu tədbirlər Azərbaycanın regionda rəqəmsal mərkəzə çevrilməsinə real zəmin yaradır.
