Türkiyə “Zəngəzur dəhlizi”nin bir hissəsi olacaq Qars-İğdır-Aralık-Dilucu dəmir yolu xəttinin təməlini qoymağa hazırlaşır.
AzPost CNN Türk-ə istinadən bildirir ki, mərasim avqustun 22-də baş tutacaq. Bu barədə Türkiyənin nəqliyyat və infrastruktur naziri Əbdülkadir Uraloğlu açıqlama verib. Yeni xəttin uzunluğu təxminən 224 kilometr olacaq.
Dəmir yolu elektrikləşdirmə və müasir siqnalizasiya sistemlərinə malik iki yoldan ibarət olacaq. Onun gücü ildə 5,5 milyon sərnişin və 15 milyon ton yük daşımağa hesablanıb. Layihəyə mürəkkəb mühəndislik strukturları – beş tunel, körpülər, viyadüklər və onlarla keçid daxildir.
Tikintinin ümumi dəyəri təxminən 110 milyard türk lirəsi olaraq qiymətləndirilir. Vəsaitin bir hissəsi 2,4 milyard avro xarici kredit hesabınadır. Xəttin 2029-cu ilin sonunadək istismara verilməsi planlaşdırılır.
Zəngəzur dəhlizi Azərbaycanı Naxçıvan vasitəsilə Türkiyə ilə birləşdirən və Avrasiya marşrutlarına çıxışı təmin edən strateji nəqliyyat arteriyası hesab olunur. Layihənin həyata keçirilməsi Türkiyənin əsas logistika mərkəzi kimi mövqeyini gücləndirməli, Asiya və Avropa arasında yük axınlarının səmərəliliyini artırmalı və regiona əlavə geosiyasi əhəmiyyət verməlidir.
