“Vivo” şirkəti “Vision” adlı ilk qarışıq reallıq (MR) cihazını təqdim edib. Olduqca yüngül olan cihazın çəkisi cəmi 398 qramdır. Müqayisə üçün qeyd etmək lazımdır ki, “Apple Vision Pro”nun çəkisi 600 qramdan çoxdur.
Cihazının çəkisinin az olması komponentlərin maqnezium ərintisindən hazırlanmış ayrı konstruksiya sayəsində mümkün olub ki, bu həm də yüksək möhkəmlik təmin edir. “Vivo Vision” kompakt ölçülərə malikdir. Cihazın hündürlüyü 83 mm, qalınlığı isə 40 mm-dir. Rahat istifadə üçün tənzimlənən üz maskaları, yumşaq qulaq yastıqları və asan tənzimləmə üçün iki halqalı tez çıxarılan kəmər nəzərdə tutulub. MR-də yüksək enerji sıxlığına malik qabaqcıl batareyadan istifadə olunub. O, bir dəfə şarj olunmaqla uzunmüddətli istifadə təmin edir.
“Vivo Vision” hər biri 3840x3552 piksel keyfiyyətli 2 ədəd Micro-OLED ekranla təchiz olunub. İstehsalçının sözlərinə görə, cihaz 36 metrlik diaqonala sahib virtual ekran təklif edir. Eynək taxan istifadəçilər üçün maqnitlə bərkidilən optik linzalar nəzərdə tutulub. O, “Snapdragon XR2+” prosessoru vasitəsilə çalışır. Cihaz “OriginOS Vision” adlı xüsusi hazırlanmış interfeysdən istifadə edir və bu, filmləri immersiv effektlə izləməyi, idman oyunlarının məkan əsaslı təkrarlarını və məhsuldar iş üçün çoxpəncərəli rejimi dəstəkləyir.
“Vivo Vision” keçidli baxış (passthrough) funksiyasına sahibdir. Tamrəngli videonun göstərilməsində gecikmə cəmi 13 millisaniyə təşkil edir ki, bu da real və virtual aləmlər arasında hamar keçidi təmin edir. Cihaz baxış bucağını 1,5 dərəcə dəqiqliklə həyata keçirir, əllərin jestlərini 26 sərbəstlik dərəcəsi və 175 dərəcəyədək şaquli diapazonla tanıyır, bu da cihazı göz və əl hərəkətləri ilə idarə etməyə imkan verir.
Ülkər XASPOLADOVA,
“Azərbaycan”
